Shillong, Lber 05 : Ka National People’s Party (NPP) kala thikna ban thaw ia ka Sorkar Synrop kaba skhem da ka jingwan kyrshan sa ka United Democratic Party (UDP) bad ka People’s Democratic Front (PDF).
Thank you UDP and PDF for coming forward to join the NPP to form the Government. The strong support from homegrown political parties will further strengthen us to serve Meghalaya and its people. pic.twitter.com/YVJlx3BxCM
— Conrad K Sangma (@SangmaConrad) March 5, 2023
Kane ka kynhun Synrop kala don mynta haduh 45 ngut ki MLA ban iathaw ia ka Sorkar ka ban ialam da ka NPP kum ka Party kaba don bun paid eh.
Ka United Democratic Party (UDP) kaba don 11 ngut ki MLA, kala phah ia ka shithi ai jingkyrshan sha ka NPP hynne ka Sngi U Blei. Ia kane ka shithi la soi da u President ka Party Bah Metbah Lyngdoh bad la aiti ha National President ka NPP Conrad K Sangma da ki nongialam ka UDP ha ka jingiadon ryngkat ki Nongiaam ka NPP.
“Khublei ia ka jingtreikam jong ka Party kaba lam sha ka jingjop kaba bun eh. Namar kane ka rai jong u paidbah, nga na ka bynta ka Parliamentary Party jong ka United Democratic Party, nga ai ka jingkyrshan ban thaw Sorkar” ong u Bah Metbah ha ka shithi.
Kumjuh ruh ki arngut ki MLA ka People’s Democratic Front (PDF) Bah Banteidor Lyngdoh bad Bah Gavin Mylliem, kila aiti ia ka shithi ai jingkyrshan ha u National President ka NPP Conrad K Sangma hynne hi ka sngi.
“Ka PDF ka kwah ban ai ia ka shithi ai jingkyrshan ha kaban thaw ia ka Sorkar thymmai kat kum ka result jong ka elekshon MLA ba dang shu dep bad khnang ban pynthikna ia ka sorkar kaba skhem, bad ruh ban iatreilang kum kawei na ka bynta ka jingkiew shaphrang jong ka Jylla bad ki paidbah nongshongshong salonsar.Ka party ka phaikhmat ban iatreilang sa shisien bad ka Sorkar ba ialam da ka NPP” ong ka shithi bala iasoi da kine ki arngut ki MLA ka PDF kiba dei u President bad Working President ka Party.
Kane ka jingwan kyrshan kine ki artylli ki party (UDP-PDF) kala wan jia ruh hadien ba kine ki ar party kila pulom ha ka jing pyrshang ban thaw ia ka Sorkar thymmai ba khlem iakhleh ia ka NPP bad BJP hapoh ka Jylla.
Kane ka kynhun synrop mynta ka don 45 ngut ki MLA ba kynthup ia ka NPP-26, UDP-11, BJP-2. PDF-2, HSPDP-2 bad 2 ngut ki MLA shimet.
Ka VPP-ka seng sain pyrthei ba dang shu mih thymmai bad kaba don 4 ngut ki MLA, kala pynthikna ba kam treh satia ban iatreilang bad ka NPP namar ki jingshah kynnoh bamsap pyrshah ia ka NPP ha ki 5 snem bala leit noh.
Kumba long mynta, ka All India Trinamool Congress (AITC) bad ka Indian National Congress (INC) lem bad ka VPP, kin don ha ka Liang Pyrshah hapoh ka Iingdorbar Thaw Ain.
Ka Liang Pyrshah kan don 14 ngut ki MLA ba kynthup ia ka AITC-5, Congress-5 bad ka VPP-4 ngut ki MLA.
