Tura, Iaiong 24 : Ka Tura Govt. College Students’ Union (TGCSU) kala mih ban ai jingkyrshan ia ka jingdawa jong ka ACHIK ban wanrah ia ka winter capital ha Tura bad ban shim ia u snem 1972 kum u snem ot kyrteng haba pyntreikam ia ka Roster System jong ka Job Reservation Policy ka Jylla.
Ha ka kyrwoh ba phah hynne ka sngi Nyngkong, u President ka TGCSU Anand Ch Momin ula ong “Ki nongialam ka TGCSU kum ka seng ki samla pule ka kwah ban ieng ha ka nongrim ha kaban kyrshan ia ka ACHIK ha ka jingdawa ia ka winter capital bad ban shim ia u snem 1972 kum u snem ot kyrteng jong ka Roster System”.
Haba kyrpad ia ka Sorkar Jylla ban wanrah ia ka winter capital, ula ong ba kane ka dei ka jingphohsniew bala angnud da ki longshuwa manshuwa kiba iakhun ia ka Jylla Meghalaya naduh u snem 1972 bad ka jingpynurlong kan dei ka jingpyndep ia ka jingiohi jngai jong ki nongpynioh Jylla.
Pule lang ia kane: Yn ioh 4G network ki 336 tylli ki shnong thain khappud ka Arunachal Pradesh
“Ka Union kam don jingartatien ba ka winter capital ha Tura lane ka Nongbah ba-ar ha Tura ka dei kaba la mynjur da baroh ki Nongialam ka Meghalaya naduh ka por ba pynkha ia ka Jylla” ula bynrap.
U Momin ula pynpaw ba ka jingiapher jingmut hapdeng ki lai jaidbynriew riewlum ba heh paid ka Jylla kala mih namar ka jingbym wanrah ia ka winter capital ha Tura namar kiwei ki riewlum kim da tip shaphang ki jaidbynriew Garo lane ka Ri-lum Garo.
Ula ong ruh ba ia ka Nongbah ba-ar la khmih lynti ban treikam kum ka Nongbah ka Jylla ha Tura ha ki hynriew bnai kata naduh u Risaw haduh u Lber manla u snem bad kiwei ki bnai kan long ha Shillong kata naduh u Iaiong haduh u Nailur.
“Namar kata, ka seng ka dawa ban wanrah noh mardor ia ka winter capital ha Tura bad ka kyrshan ia ka jingdawa jong ka ACHIK halor kane ka kam bad kan ai ruh ia ka jingiatreilang tad haduh ban da urlong ka jingdawa” pynkut u Momin.
Pule lang ia kane: Rai lang ki District Council ka Jylla ban pyrshah ia ka jingtreikam ka UCC ha Jylla
