Kyrshan ka NHRC ia ka thma pyrshah droks ka Meghalaya | Iaroh ia jingshim bynta ki Nongshongshnong

Phah tuklar ha ka NHRC ban pynkha ia ka Zonal Office ka NCB ha Shillong

Shillong, Naitung 07 : Ka National Human Rights Commission (NHRC) kala kular ban ai ka jingkyrshan ba pura ia ka jing pyrshang ka Sorkar Jylla haba ai jingiaroh ia ka jingmih shakhmat ki nongshongshnong ban iakhun pyrshah ia ka thma droks ha ka Jylla.

Kane ka jingkular kala mih ha ka jingialang High Level Meeting ha ka sngi Nyngkong,kaba la pyniaid da u Symbud Myntri Rangbah ki kam Pohiing (Police) Bah Prestone Tynsong, ha ka jingiadonlang u Special Monitor ka NHRC Rakesh Asthana uba dei ruh u Director General barim ki shipai BSF bad u khlieh duh ka Narcotics Control Bureau (NCB).

U Asthana ula wan iuhkjat ban pynlut por lai sngi ha Jylla Meghalaya ban peit thuh bad lum jingtip halor ki kam khaii droks hapoh ka Jylla.

Haba iakren bad ki nongthoh khubor hadien ka jingialang, u Nongaiktien ka Sorkar bad Myntri ka Tnad Social Welfare Bah Paul Lyngdoh ula ong ba une u Heh ka NHRC ula iaroh bha ia ki sienjam ba bun rukom jong ka Jylla, khamtam ka DREAM Project, kaba kynthup ia ki jaka pule, ki seng niam, ki dorbar shnong ha ka jingiakhun pyrshah ia u droks.

“Ka Meghalaya ka dei katto katne na ki Jylla hapoh ka Ri kiba la shim ia ka lynti ban pyniadon bynta ia ka imlang sahlang ha ka jingiakhun pyrshah ia u droks” ong u Bah Paul haba bynrap “Ka NHRC kala kular ia ngi ban ai ka jingiatreilang bad ka jingkyrshan kaba pura”.

Ha ka jingialang, ki Heh Sorkar ka Jylla kila kren halor ki jingma ba ap ia ka Meghalaya na ka jingiajan jong ka Jylla ia ka Golden Triangle-kawei na ki thain pynmih droks ba bun eh ha ka thain-haba pynpaw ba ki lynti wanrah droks na Myanmar kila buh ia ka Jylla ha ka jingma ha ki kam khaii droks.

Ka Jylla kala pan ruh ia ka jingkyrshan jong ka NHRC ban thaw ia ka Sub Zonal NCB Office ha Shillong ban pynkhlain ia ka jingdon ki briew ki ban treikam bad ban pynkloi ha kaban pynioh ia ki 2 tylli ki vehicle scanner, bala dep tyrwa sha ka Sorkar Pdeng, ki ban ieng ha ki jaka rung ba kongsan ha Ri-Bhoi District.

U Bah Paul ula pynthikna ba u Heh ka NHRC ula kular ban sa tuklar halor kine ki kam.
Ha kane ka jingialang la wan iashimbynta da ki Heh Pulit kynthup ka DGP, nalor ki nongmihkhmat na ka Tnad Social Welfare, Tnad Law, bad ka DREAM Mission. Ka jingialang buddien kaba kham janai kan sa long lashai ka sngi Ba-ar.

U Myntri ula kren ruh halor ka jingdonkam ia ki ain kiba kham khlain, haba kyrpad ia ka Sorkar Pdeng ban pyniar ia ka jingset along hapoh ka PIT NDPS Act sha ka lai snem-ka sienjam ban tehlakam ia ki nongkhaii droks bala kem bun sien. Ia mynta, saw ngut ki briew kila ngat hapoh ka PIT NDPS katba 12 ngut ki dang don hapdeng ka jingbishar.

Haba kdew ia ka jingduna ki nongtrei kiba la dep pyntbit, u Bah Paul ula kyntu ban nang mang kham bun ki kam drugs counsellor bad ka jingpynkha ia ki fest track courts ban lah pynkloi ia ki jingtian bishar.