Shillong, Risaw 30 : Ka Meghalaya Tribal Teachers’ Association (MeTTA-NEHU) kala ai ka jingkyrshan kaba pura ia ki jingdawa ka NEHUSU bad NEHUTA, ban wengkam noh mardor ia u Registrar bad ki arngut ki Deputy Registrar ba dang shu thung thymmai namar ka jingshem ba kim long kiba ibit bad lah ban pyniaid ia ki kam ki jam.
Ha ka kyrwoh bala pyllait ha ka sngi Balang, ka MeTTA-NEHU kala pynpaw ia ka jingsngewkhia ia ka jinglong jingman ha NEHU halor ki kam ba iadei bad ki jingbym treikam hok jong u Registrar bad ki Deputy Registrar, kiba dang shu thungkam shen.
Ka Association kala pynpaw ruh ia ka jingsngewkhia halor kiba bun ki jingleh bym hok bad jingbym wan treikam hok da kine ki Ophisar ki bym don jingtip satia ia ki Rule bad ki rukom pyniaid kam. Kine kila paw na kiba bun ki shithi ba kila phah na ka por sha ka por.
“Kat kum ki tyllong khubor, la ioh jingtp ba ki don bun ki kyrtong kiba don kyrdan bad shemphang, kiba la shakri ha ki tnad bapher bapher jong ka Sorkar Jylla, kiba la aplai ia ka post hynrei kila shah kyntait. Hynrei, u Amit Gupta, u bym don jingshemphang satia ha ka rukom pyniaid ia ki University, ula shah thung kum u Deputy Registrar” kala kynnoh haba bynrap “Nalor kata, la ioh jingtip ruh ba ha ka jingthungkam dang shen ia ki post contract ha ka Integrated Teacher Education Programme (ITEP), NEHU, ki don bun ki kyrtong ki bym don kyrdan, ki bym shym la shah khot Interview, ki kyrtong ki bym don kyrdan kila shah thungkam”.
Haba khmih ia ka jinglong jingman ha NEHU, ka MeTTA ka kyrshan ia ka jingdawa ka NEHUSU ban weng kam noh ia u Registrar, Col (Retd) Omkar Singh bad ka jingdawa ka NEHUTA ban wengkam ia ki arngut ki Deputy Registrar ba dang shut hung thymmai, ia kiba la shem ba kim pat ibit bad pat lah ban pyniaid ia ki kam ki jam.
