Nongpoh, Naiwieng 20: Kum kawei na ka thong ban ratdyngkhong ïa ka jingpang TB, ka ophis ka District Tuberculosis officer Ri Bhoi ryngkat ka jingïatrei lang bad ka Nezone Pipes & Structure NTL Steel ki la pynlong ïa ka prokram ai jinghikai bad sam ïa ki jingbam tei met sha ki nongpang TB ha Ri Bhoi.
Ïa kane ka prokram la pynlong ha phyllaw ka Civil Hospital Nongpoh, ha kaba ka Company, Nezone Pipes & Structure NTL Steel ka la mih shakhmat ban kyrshan da ki jingbam tei met ia kiba dang sumar pang TB katba ki dang don ha ka jingsumar jong ki doctor.
Ha kane ka prorkam la wan shim bynta ruh naduh ka District Medical & Health Officer ka Ri Bhoi, ka Dr. TS. Momin, ka District tuberculosis Officer, ka Dr. E. Kalwing, u Director ka Nezone Pipes & Structure NTL Steel, u Yash Agarwal bad kynthup ruh naduh kiwei ki doctor, ki Nurse bad ki nongpang TB kiba la wan ban shim bynta ban ioh pdiang ïa kitei ki jingbam.
Kum ban pynkynmmaw, kane ka prokram ba la pynlong ka dei ruh kawei na ka thong jong ka Pradhan Mantri TB Mukt Bharat Abhiyan (PMTBMBA), kaba dei ka thong ban pynduhjaid noh ïa ka jingpang TB naduh u snem 2025 ba la buh thong da ka sorkar kmie.
