Tura, Nailar 11 : U Vice President ka BJP bad MDC ka Tura Bernard Marak ula phla ba u MP ka Lok Sabha na Tura Saleng A Sangma, ula pan ia ka jingkyrshan n aka BJP ha ka por ba iakhun ia ka elekshon.
“U (Saleng) dei ban ai khublei ia ka BJP namar ka jingbym pynieng kyrtong ha ka elekshon.
U dei ban sngewnguh ba nga ruh nga khlem iakhun kum u kyrtong shimet. Ngam lah ban sngewthuh, balei ba u (Saleng) kren pyrshah ia ka BJP haba ka BJP kala kyrshan ia u ban ioh ia ka jingjop” ong u Bernard ha kawei ka interview u nongleh Youtube.
U Bernard ula ong ba u Saleng ula wan iakynduh marmet ia u (Bernard) bad kyrpad ban nym mih iakhun kum u kyrtong shimet bad ban kyrshan ia u (Saleng) kum u kyrtong.
U Bernard ula kynthoh ba jin da ka BJP ka mih ban iakhun, ka jingjop jong u Saleng Sangma kan long kaba stang bha.
Ula ong ruh ba ki nongkyrshan ka BJP kila kyntait ban vote ia ka NPP wat hapdeng ki jingbthah jong ki Nongialam ka Delhi.
“Ki Nongkyrshan ka BJP ha Ri-lum Garo kim kwah satia ban kyrshan ia ka NPP” ula bynrap.
Mynta, ba la saphriang ka khubor ba ki 3 ngut ki MLA ka Congress kilah pynkhreh ban pyniasoh noh sha ka NPP, la pur ka khana ba ka BJP ka lah ban khroh ia u Saleng Sangma ban wan iasoh noh sha ka BJP naba ka Congress kala khyllem ha Meghalaya watla kala ioh ia ka jingjop ha Ri-lum Garo.
Ki riew peit pyrman ia ka sain hima sima kila pynpaw ba ka Congress kala pyrshang ban rahskong ia ka jingjop jong ka ha ka elekshon Lok Sabha hynrei ka jingmih pat kala long da pyrdet ha kaba bun ki nongkyrshan ka Congress ki don ia ka jingsngew mynta ba kila shah thoh bad sdang ban phaikhmat noh sha kiwei pat ki party.
