Shillong, Nailar 29 : U MLA ka Nongthymmai Bah Charles Pyngrope ha ka sngi Palei, ula kyrpad ia ka Sorkar Jylla ban mang pisa T.5 klur na ka bynta ban shna pynbha ia ki surok hapoh ka constituency jong u khamtam ba mar shiteng na ki Myntri Sorkar ki dei kiba sah hapoh ka constituency.
Haba wanrah ia ka jingkylli bynrap hapoh ka Iingdorbar, u Bah Charles ula ong “Haduh shiteng na ki Myntri ka Sorkar ki sah hangne hynrei ki surok ha Nongthymmai ki sniew bha lait noh tang ka surok na iing u Symbud Myntri Rangbah ban leit sha Iing jong Nga”.
Nalor u Symbud Myntri Rangbah ba khmih iaka Tnad PWD Bah Prestone Tynsong, une u MLA ula jer kyrteng ruh ia u Symbud Myntri Rangbah ka Tnad Urban Affairs Bah Sniawbhalang Dhar, u Myntri ka Tnad Animal Husbandry & Veterinary Bah A.L.Hek, u Myntri ka Food Civil Supply Bah Comingone Ymbon, Myntri ka tnad PWD Marcuise N Marak ruh ki dei kiba sah bad don iing ha Nongthymmai constituency.
Haba pynpaw ba ka thup kyrteng ka dei kaba jrong, u Bah Charles ula ong “Nga lah ban tip la un (Prestone) mang T.5 klur ban shna pynbha ia ki surok ha Nongthymmai constituency”.
Haba jubab, u Bah Prestone ula ong ba ka jingthmu jong ka Sorkar Jylla bad ka Tnad haba iadei hi bad ka Shillong, ka long ban pynthikna ba baroh ki surok ba saw aiom, ki dei ban long kiba bha.
“Ha ka jingshisha, nga la dep bthah ia ki Engineer ba kin leit ban khein ban diah haba iadei bad ka jingpynbha ia ki surok ka Shillong bad ban kila pynkhreh ia ka mang tyngka. Hadien ba kila wanrah, ngin sa shimkhia bad pynioh ia ka mang pisa. Ngin sa pyntrei bad maramot ia ki surok”.
