Shillong Risaw 8: U Symbud Myntri Rangbah ka jylla u Bah Prestone Tynsong, ula kyntu ia ki paidbah ba kin iai shah shipor ia ka jingsniew ka surokbah National Highway-6 namar ia mynta ym pat lah ban leh eiei namar ka jingbym ailad ka bneng.
U Bah Prestone ula ong, ba ka jingmaramot iaka surok ka dei ka bym lah ban leh ha ka por slap bad kam long kaba suk ban maramot ia ka surok ha ka por slap, kumta tang shu rang yn sa maramot noh mardor ia katei ka surok kaba la sniew.
“Nga tharai kaba khatduh hi ka ban slap kadei sa tang mynta u bnai, lait nangta kala rang bad ngin peit bad pynthikna ba ka NHAI ka dei ban pyntrei sted ia ka kam ban maramot ia katei ka surok” ong u Bah Prestone.
Ula ong ba ka sorkar jylla kala shimkhia ia ka jingsniew jong ka surokbah National Highway-6 bad ia ka jingtwa khyndew ha ka thaiñ Sonapur bad ula leit ruh ban pynsngew ia kane ha ka jingialang bad ki heh jong ka sorkar pdeng.
“Dang ha u bnai uba la dep, nga la leit iakynduh bad shong jingialang bad u Secretary ka Ministry of Road Transport & Highways (MoRTH) bad u Chairman ka National Highway Authority of India (NHAI) bad kila pynthikna ia ngi, ba kin sdang noh iaka kam ban shna iaka surok bad kila dep ruh ban pynkhamti ia ka kam ha ki kontraktor, hynrei namar ka jingbym ailad ka bneng ym pat ioh ban leh eiei bad mar ia rang yn sa sdang noh ban maramot ia katei ka surokbah” ong u Bah Prestone.
Ula ong ba ka jingsniew ka surok NH-6 khamtam na Khliehriat sharum ka jingsniew ka surok kala long kaba shyrkhei, kumta ula phah ban leit jurip ia katei ka surok naduh ka MLA ka thaiñ, u Secretary ka PWD, u Chief Engineer ka PWD ryngkat bad ki ophisar jong ka NHAI bad kila dep ban aiti ia ki kaiphod kaba bniah.
Ha kaba iadei bad ka jingtwa khyndew khah khah ha ka Tunnel bad surok kaba ha Sonapur, na ka liang u Symbud Myntri Rangbah uba khmih ia ka tnad PWD (R&B) ula ong, “Ka jingtyrwa kala don ban shna ia ka surok Four Lane ha katei ka thaiñ bad ngam pat lah ban ong ba ia katei ka surok yn pyniaid nangno, hynrei ha kaba iadei bad ka Tunnel kaba twa la kynthup lang bad yn ai ia kawei ka kynhun kaba kyrpang kaban peit bad pynkhuid ia katei ka Tunnel kaba long ka jaka ka bym shngain”.
