Shillong, Jymmang 02: U Myntri Rangbah ka jylla u Conrad K Sangma hynne ka sngi ula ong ba ka jingkyrduh bording elektrik haka jylla kadei kawei na ki jingeh kaba khraw bha ia ka tnad Bording ha ka jylla bad ula pynthikna ba ka sorkar jylla ka dang wad ia ki lad ki lynti ha kaban pynduna ia ka jingshem jingeh kaba mad da ki paidbah naka jingpynlip iaka bording elektrik.
“Ngi kyntu ia ki nongshong shnong ba kin shah shitom ia ka jingeh kaba ngi mad. Ka long kaba eh bad ka jingtynjuh ia ngi baroh. Ngi dang trei ha kata ka lynti ban pynduna noh iaka jingeh kaba phi mad, da kaba pynduna noh iaka por bad ban don noh iaka jingpynlip iaka bording na ka bynta ki jaka ki bapher bapher katkum ka jinglong jingman jong ka suinbneng” ong u Myntri Rangbah haba iakren bad ki nongthoh khubor.
“Kane kadei kawei na ki jingeh kaba khraw ia ka tnad Bording hynrei ngi hap ban iaid shakhmat bad ngin sa iohi ba ha kine ki bnai bad ki snem ban wan ba kum kane ka jingjia kan ym long shuh kaba shyrkhei kumba ngi iohi ha kine ki bnai. Ngin sa iohi iaka jingkylla namar ki don bun ki kam ki jam kiba la sdang ban iaid shakhmat bad ngin sa ioh iaka resol ha ki sngi kiban wan. Kumta kaei kaba jia mynta ngin ym iohi shuh ia kum kane ka jingeh kaba khraw ba kan jia biang ha ki pateng ban wan” ula ong.
U Myntri Rangbah ula ong, ba ha kum kane ka khyllipmat, ka lad kaba lah ban weng ia ka jingeh kadei tang lada don ka jingjur u slap bad shisien ba ka jylla kala ioh ban thied iaka bording elektrik ha ka dor kaba bit ba biang.
Ula ong ba ka dor jong ka bording elektrik ka long kaba rem bha ia mynta namar ba ka don ka jingduna haka jingshalan iaka bording ha kylleng ki jylla da ki Power Grid bad ki kynhun bapher kiba pynmih iaka bording.
“Baroh kitei ki jingeh ki don hynrei nga kyrmen ba ngin lah ban iaid shakhmat bad ban lah ruh ban pynduna iaka jingeh ha kine ki por ban wan, khamtam haba ngi iohi ba ka aiom lyiur kala wan. Kane dei kawei na ki lad ban weng ia ka jingeh ha kum kane ka khyllipmat” ong u Conrad.
Nalor kane ula iathuh ba ka Meghalaya Energy Corporation Limited (MeECL) ka mad ia ka jingkyrduh pisa bad ka donkam iaka jingkyrshan jongka sorkar jylla.
“Ngi ai ka jingkyrshan (MeECL) bad dei na kane ka daw ngi la lah ban pynbiang ia ki katto katne ki bynta ha ki kyrdan ki bapher, hynrei kitei ki jingeh ki long kiba khraw bad kumta ka long kaba donkam ban wanrah iaka jingkylla hapoh jongka MeECL bad kane ruh kala sdang bad ngin sa iohi ba lyngba katei ba mynta u snem bun ki jingkylla kin sa urlong ha katei ka jaka” ong u Conrad.
Hashwa kane u Myntri Rangbah ula ong, ka dawbah jong ka jingpynjlan iaka jingpynlip iaka bording elektrik kadei namar ba kam ioh ban pynlip iaka bording naduh bas dang u snem namar ka jingpynlong iaka elekshon ha ka jylla, ia kaba bunsien ha ka jylla la sdang iaka jingpynlip iaka bording elektrik naduh u bnai Kyllalyngkot haduh u bnai Jymmang bad ka kynta pynlip iaka bording ka long tang 2 ne 3 kynta.
“Mynta u snem, ngim shym la lah ban leh kumtei bad kumta ngi la hap ban kit ia ka jingkit kaba khia ha kine ki 3-4 bnai naduh shiteng u Iaiong bad u Jymmang” la pynkut u Myntri Rangbah.
