Shillong, Iaiong 23: U Myntri Rangbah ka Jylla Conrad K Sangma, ula buh ka jingkyntu ia ki paid Assam bad Meghalaya ba kin kiar na kaba shim ia ka ain hala ka jong ka kti bad kumjuh ruh ban leh ia ki kam pynhiar kput, halor ka jingshah thang ki lai ngut ki samla Assam ha Rongmil, myn ha ka 17 tarik Iaiong.
U Myntri Rangbah ula pynrem jur ruh ia kane ka jingjia bad pynpaw ba ka jinglap ia ki metiap bala thang jong ki lai ngut ki nongshongshnong ka Assam, bala tep hajan ka kali kaba la thang, ka long kum ka jingpynkynmaw ia ka jingleh dusmon kaba lah ban pynkhynniuh ia ka jingiadei hapdeng ki Jaidbynriew jong ngi.
“Nga pynrem jur ia kane ka kam shyrkhei. Kum kine ki kam kim don jaka satia ha ka imlang sahlang jong ngi bad ka dei ka jingiuhroit kaba khraw tam ha ngi kum u khun bynriew” ong u Conrad.
U Conrad ula ong ba ha kum kane ka por ka bym lah ban tip aiu ka ban jia, ki riew shimet bad ki paidbah ki dei ban tyrwa ia ka jingkyrshan bad sngewlem sha kito kiba shah ktah ha kane ka kam dusmon. Ula kyntu ruh ia ki nongshongshnong ka Assam bad Meghalaya ba kin kiar na ka jingshim ia ka ain hala ka kti bad leh ia kino kino ki kam kiba long kum ka jingpynhiar kput.
“Nga kyrpad ia phi ban nym pdiang ia ki jingpynshoi jong kito kiba kwah ban shim kabu na kane ka jingjia na ka bynta ki buit myntoi jong ki, la ka dei ka jingaiding ban wanrah ia ka jingiapher Jaidbynriew lane ka jingpynsaphriang ia ki khubor thok” ula ong.
U Conrad ula pyntip ba ka Sorkar Jylla kala dep shim ia ka sienjam da kaba thung ia ka jingtohkit kaba bniah halor kane ka jingjia khnang ban ioh kem ia ki briew kiba donkti bad ban ai jingpynsajia kat kum ki ain.
Ha kajuh ka por, u Myntri Rangbah ula phah ia ka kyrwoh sngewlem sha ki bahaiing jong ki longiing ba shah ktah ha kane ka jingjia.
