Shillong, Naitung 29: Ka Sorkar Meghalaya kala buh ia ka jingkyrpad sha ka Ministry of Civil Aviation ban ai jingithuh noh ia ka Shillong Airport kum ka International Airport.
Ia kane la pyntip da u Myntri Rangbah ka Jylla Conrad K Sangma haba kren ha ka Annual Conference ba 20 jong ka Commonwealth Parliamentary Association (CPA) India Region Zone-III ba long hynne ka sngi Saitjain ha Shillong.
U Myntri Rangbah ula pyntip ba ka Shillong Airport, kaba shakri ia kumba 10,000 ngut ki nongleit nongwan shibnai, kala lah ban pyniasoh ialade da ka jingpynher liengsuin beit beit na Shillong sha ki Sor Heh ka Ri kum ka Delhi, Kolkata, Aizawl, Agartala, Imphal, Dimapur, Dibrugarh bad Guwahati.
“Ha ryngkat ka jingiatreilang bad ka Sorkar India, ngi lah shim mynta ia ki sienjam ban kyntiew kyrdan noh ia ka Shillong Airport khnang ba yn lah ban wan hiar ki liengsuin kiba heh. Nalor kata, ngi la iakren ruh bad ka Ministry of Civil Aviation ban kyntiew kyrdan noh ia ka Shillong Airport kum ka International Airport. Kane kan pynkhlain ia ka jingpyniasoh beit beit sha ki Rib a marjan jong ka thain Shatei Lam Mihngi bad kan nang pynkhlain ia ka Act East Policy” ula ong.
U Conrad ula kren ruh halor ka jingpyrshang jong ka Sorkar India hapoh ka Act East Policy ban bei tyngka ia ki project bapher bapher lyngba ka Ministry of External Affairs, ban pyniasoh hapdeng ki Jylla ka thain Shatei Lam MIhngi bad ki Ri ba marjan kum ka Myanmar bad Bangladesh. Kane kan kynthup ruh ia ki jingplie ia ka lynti ban kyntiew ia ka ioh ka kot.
Haba banjur halor ka jingkongsan ban shim ia ki sienjam kat kum ka jingkotbor ka thain, u Conrad ula kren halor ka jing donkam ban iatreilang hapdeng ki kompani bad ka Sorkar ban pynsted ia ka roi ka par jong ka thain haba ban jur pat ia ka jingkongsan ban pynbiang tarajur ban nym buh jingma ia ki riti dustur jong ki nongshongshnong ka thain.
Meghalaya is honoured to host the 20th Annual Conference of Commonwealth Parliamentary Association (CPA) Conference. We are elated to have Hon’ble Lok Sabha Speaker, Sh. @ombirlakota ji today. We also welcome Hon’ble Speakers from NE states to Shillong.
Spoke on the 2 key… pic.twitter.com/5YJ8Aw4FIR
— Conrad K Sangma (@SangmaConrad) July 29, 2023
Haba shim nuka ia ka jingjop jong ki karkhana rit ha ri Europe bad Asia, u Conrad ula ai jingmut ban wanrah ia ki buit ha ka trei ka ktah bad ki jingtei bapher bapher ban kyntiew ia ka ioh ka kot jong ka thain Shatei Lam Mihhngi haba iada pat ia ka mei mariang ka thain ka bym don sha kiwei kiwei ki jaka.
U Conrad ula pynpaw ruh ia ka jingsngewnguh ia u Myntri Rangbah Duh ka Ri bad ka Sorkar India halor ka jingwanrah iaki buit bapher bapher, ki policy bad ki kam pynroi bala mang beit thik tang ia ka thain Shatei Lam Mihngi.
Ula kren ruh halor ka jingkongsan ban kynshew pisa ha ki kam ba donkam ka thain kum ha ka kam jngohkai, ki jingtrei ia ki jingtei ba kongsan, ki kam shna jingbam na ki marbam bad kiwei kiwei.
Haba phai sha ki lad pyniasoh hapoh ka thain, u Conrad ula ban jur halor ka Act East Policy jong ka Sorkar India bad ong ba ka thain ka dei kaba riewspah bha ha ka jingdon ka umphniang, ka natural gas, dewiong, mawshun bad ki jaka rep ba pahuh bha.
U Conrad ula kdew ba bun na ka kam khaii pateng jong ka thain Shatei Lam Mihngi ka Ri India ka long bad ka Bangladesh, ka kam khaii bad ki Ri ba marjan kum ka Bhutan bad Myanmar ki ju long lyngba ki jaka khappud kiba don shabar jong ka thain.
Ban pynkhlain ia ka jingiadei bad ka Bangladesh, u Conrad ula ong ba ka Meghalaya kala trei shitrhem ban pynkhlain ia ka kam khaii pateng ha ki jaka khappud. “Kum shibyn na kane ka jingpyrshang, ka Sorkar kan sa pynbun ia ki jingtei ba kongsan ha khappud da kaba pynkha kham bun ki Integrated Check Point (ICP) ha ryngkat ki Land Custom Station bad ki Border Haats” ula ong haba kdew ba la nang pynjanai ruh iaka jingpyniasoh surok na Dawki-Bholaganj bad Tura-Dalu nalor ka jingbuh ia ka Integrated Check Post bad Border Haats ban pynkhlain ia ka kamai ka kajih ki nongshongshnong.
Pule ruh: Dawa ki nongtrei Midday meal naka sorkar ban ai shuti haki por armet bad shitom
