Nongstoiñ, K’lyngkot 10: Ki shnong jong ka thain Langpih, kila kyrpad ia ka Sorkar Jylla ba kan ym pynslem shuh ha kaban iakren pynbeit noh wut wut ia ka kam iakajia pud bad ka Assam khnang ba shongsuk shongsain kan wan noh hapoh ka thain.
Kane ka sur kala mih na ka Synjuk ki Nongsynshar Shnong ka Hima Nongmynsaw, kiba la leit iakynduh bad buh dorkhas hakhmat u Deputy Commission ka West Khasi Hills, hynne ka sngi Balang, kaba pynpaw ba ki paidbah ka thain kila kwah dik dik ban pyndep noh ia ka jingiapynbeit pud jong ka Langpih sector.
Haba iakren bad ki lad pathai khubor, u President ka Synjuk Bah Serbilin Lyngdoh ula pyntip ba naduh u snem bala leit, ka Sorkar kala ju kren ba kan bthah ia ki dkhot ka Regional Committee on Border Dispute jong ka West Khasi Hills ba kan leit jurip bad sngap ia ka sur u paidbah bad ki jingeh ba ki iakynduh.
“Hynrei haduh mynta, kane ka Committee ba khlieh da u Bah Paul Lyngdoh, kam pat wan iuhkjat satia ha ka thain. Ngi dap da ka jingsngewkhia bad sah ha ka umdum ia ka jingpynslem baroh” ula ong.
Haba kylli, u pyntip ba u Deputy Commissioner ula kular ba un sa phah ktien sha ka Sorkar ia kaei kaba la pynsngew da ki paidbah bad ka synjuk khnang ba kan ym don shuh ka jingartatien ia kane ka kam.
