Shillong Risaw 13: Ka Synjuk ki Rangbah Shnong Border Area Raid Nongtung, Ri Bhoi jong ki Shnong ka Block-II, hynne ka sngi Thohdieng kila kyrpad ia u Chief Executive Member ka KHADC Bah Pyniaid Sing Syiem ba un tuklar ha kaban lah weng noh ia ki khyrdop lum khajna jong ka tnad Forest ka Karbi Anglong Autonomos Council (KAAC) ba don ha ka thain.
Lah pyntip ba ka Karbi Anglong Autonomous Council (KAAC) kala buh haduh 5 tylli ki khyrdop jong ka Tnad Forest ba kan lum khajna ia ki mar khlaw ha ka thain hynrei la kynnoh ba kine ki khyrdop kila pyndik pynban ia ki paid Khasi-Pnar ban lum khajna beain wat na ki mar rep mar riang.
U President jongka Synjuk u Bah Blikstar Sohtun ula aiti da ka dorkhas ha u CEM ka KHADC ha ka jingiadonlang u MLA/MDC ka Mawhati Bah Charles Marngar bad u MLA/ MDC ka Mylliem u Bah Ronnie V Lyngdoh.
U Bah Blikstar ula ong ba kine 5 tylli ki khyrdop lum khajna ki don ha ki jaka kiba don hapdeng ka jingiakajia pud kiba kynthup ha ka shnong Umlaper, Umsynduk, Sabuda, Madan Umwang bad ha Umjaknih.
“Ka jingdon kitei ki Forest Gate kala buh ia ki paid nongrep ha ka jingeh kaba khraw, namar kila lum pisa wat na ki marrep ruh. Kine ki khyrdop kila lum ia ka khajna ba long hapdeng T7000 haduh T.8000 kawei ka pick up ba kit ia ki marrep. Kane kala ktah jur ia ki nongrep ka thain” ula ong.
Ula kynnoh ba ka jingpyndik ia ki paid Khasi-Pnar ka long ruh wat haba ki leit kit ia ki diengiap ban pyndonkam haba shet ba tiew hala iing. U iathuh ba lada ki briew ka Tnad Forest ki lap ha lynti, ki ju bat bad dain kuna ruh kumjuh.
U President ka Synjuk ula ong ba ka jingwan iakynduh ia u CEM ka KHADC ka long ba un shimkhia ban iakren noh mardor bad u CEM ka KAAC khnang ban un phah weng ia katei ka jingeh kaba ki paidbah ka thaiñ Block II ki mad.
Ka Synjuk kala pynpaw ruh ia ka jingsngewnguh ia u CEM ka KHADC Bah Pyniaid Sing Syiem uba la shimkhia bad leit jurip ia ka thaiñ khappud mar syn shimti kum u CEM bad da ka jingshimkhia ka jongu bad ka KAAC, kala don ka shongsuk shongshngain ha katei ka thaiñ khappud.
