Shillong, Lber 03: Ki MLA ka South Garo Hills District kila rai ban kyrpad ia u Myntri Rangbah ka Jylla Conrad K Sangma ban iakren lem bad ka Sorkar Pdenge ba kan pynpoi ia ka lynti rel shaduh sha Bagnmara.
Haba pyntip ia kane hynne ka sngi Nyngkong, u Myntri ka Tnad Pule Puthi Rakkam A Sangma ula iathuh “Nga ha ryngkat ki 4 ngut ki MLA na ka District ngin sa iakynduh ia u Myntri Rangbah ban aiti ia ka dorkhas ban pynpoi lynti rel na Guwahati sha Mendipathar bad Baghmara bad wat sha Dhaka”.
“Kane ka dei ka lynti iaid hadien habud namar shuwa ka jingioh laitluid khamtam ka South Garo Hills, ngi ju pyniaid ia ka khaii ka pateng kaba iaid bha na ka thain” ula bynrap.
Ula pynpaw ba ka Ri America ka riewspah namar ka don ia ki surok kiba bha bad ong “Kumta, ka lad pyniasoh ka long kaba kongsan na ka bynta ka roi ka ioh ka kot jong ka thain”.
“Ngin sa kyrpad ia u CM ban iakren lem bad ka Sorkar Pdenge ba kan pynpoi lynti rel sha Baghmara bad sha Dhaka” ong u Rakkam.
Hynrei ula ban jur ia ka jingdonkam ban buh ia ka Integrated Check Point ban tehlakam ia ka jingwan rung ki mynder.
