Shillong, Jylliew 09 : U Symbud Myntri Rangbah ba khmih ia ka Tnad Urban Affairs Bah Sniawbhalang Dhar ha ka sngi Nyngkong, ula pyntip ba ka Tnad kala ioh pdiang ia shibun ki jingkyrpad na ki Shnong bapher bapher ban pyndait kor Close Circuit Television (CCTV) khnang ban pynthikna ia ka jingshngain jong ki nongshongshnong ka Shillong.
Kane kala mih hadien ka jingjop ka jingpyndait ia palat 335 tylli ki kor CCTV hapoh ka Integrated Command & Control Centre (ICCC) ha kylleng ki jaka ka nongbah Shillong, ong u Bah Sniawbha haba iakren bad ki nongthoh khubor.
U DyCM ula ong ruh ba kala don ka jingthmu ban nang pyniar ia ka jingpyndait ia ki kor CCTV ha kiwei kiwei ki bynta jong ka Jylla kynthup ha Jowai bad Tura.
“Ngi dang shong bishar mynta haba buh hakhmat ia ka jingeh jong ka jaka. Ka jingdonkam ia ka CCTV kan long kaba bun” ula bynrap.
Ha kajuh ka por, u DyCM ula ai khublei ia ka Tnad Home (Police) kiba la lah ban sei madan ia ki jingshisha halor ka jingshah pyniap uwei u nong Indore Raja Raghuvanshi, uba wan leh honeymoon bad la ka kurim ha Sohra, da ka jingioh kem ia ka kurim lem bad 4 ngut ki runar kiba donkti lang.
“Nga kwah ban ai khublei ia ka Tnad Pohiing, kila leh ia ka kam kaba khraw bha ban iohkem ia kine ki runar. Nga kwah ban ai khublei ia ki trai shnong kiba la ai ka jingiarap ia ki Pulit, NDRF, SDRF ha ka jingiawad ia kine ki shikurim ba jah” ula ong.
Ha kajuh ka por u Bah Sniawbha ula ong ba ka Sorkar kan sa leh eiei ha ka pork aba dei pyrshah ia kito kiba pynbudnam sniew ia ka Jylla Meghalaya.
