Shillong, Lber 10 : U District Magistrate ka West Garo Hills Vibhor Aggarwal ha ka sngi Ba-ar, ula kyrpad ia ki shipai ban pynlongda ka ‘flag march’ ha ki 37 tylli ki shnong kiba don ha ki jaka them ka District, kaba la don hapdeng ka jingkulmar na ka jingiakynad pher jaidbynriew.
Kane ka jingiakynad kala mih namar ka jingkhang ia ki bar Jylla ba kin iashimbynta ha ka elekshon Garo Hills Autonomous District Council (GHADC), ka ban long ha ka 10 tarik Iaiong.
Ha ka shithi sha u Commanding Officer ka 101 Area, Eastern Command, u Vibhor ula ong “Nga kyrpad da kaba burom ia ka jingiarap lem ki shipai ban pynlong ia ka ‘flag march’ ( iaid pahara) ha ki jaka them jong ka West Garo Hills, namar ka jingthut ka shongsuk shongsain ha ka thain”.
U District Magistrate ula thoh ruh ba ka jingpyrshah ia ka jingiashimbynta ki bar jylla ha ka elekshon GHADC kala pynthut ia ka shongsuk shongsain ha ka thain bad dang shen, kala mih ka jingkynad pher jaidbynriew hapdeng ki ar kynhun, kaba la wanrah ia ka jingkulmar kaba jur.
“Ka jingdon jong ki shipai kan iarap bha ha ka ban ai jingkyrmen biang ia ki paidbah, khanglad ia kino kino ki jingjia ki bym sngewtynnad, bad pynneh biang ia ka jingsngewskhem hapdeng ki nongshongshnong” ula ong bad bynrap “…ka flag march da ki shipai kan long kum ka jingpyni ia ka jingpynkhreh bad ka jingkut jingmut ban pynneh ia ka shongsuk shongsain ha ka thain”.
U District Magistrate ula kular ruh ba ki bor district bad ki Pulit kin ai ia ka jingiatreilang kaba pura ban pynurlong ia kane.
