Shillong, Nailar 06: Ka Sur Paidbah ka South West Khasi Hills District ha ka sngi Balang, ka la kyrpad ïa u Myntri Rangbah ka jylla Conrad K Sangma ban pynkloi ia ka mang tyngka ban shna ïa ka surok Standard Intermediate lane ha ka surok Weiloi-Mawkyrwat-Khatphra (Ranikor).
Lah ban kdew ba haka 2 tarik Nailar ka Sur Paidbah South West Khasi Hills District ka la aiti ruh iaka dorkhas ban pynkynmaw halor kane ka Project sha u Symbud Myntri Rangbah ba khmih iaka tnat PWD (Roads) u Bah Prestone Tynsong.
Ka Sur Paidbah South West Khasi Hills District kala kam ba kane ka surok ka long kaba kongsan ha ka liang ka jingshngain jong ka Jylla bad kadei ka ba kongsan ban kyntiew ha ka liang ka ioh ka kot na ka bynta kane ka thain.
“Ngi la kyntu ïa u Myntri Rangbah ka Jylla ban pynkloi ïa ka jingmang tyngka ïa kane ka projek, da kaba kdew ïa ka jingdonkam ban pynbha ïa ki jingtei hapoh ka thaiñ” la ong u Chairman ka Sur Paidbah South West Khasi Hills District u Bah Kitborlang Nongrem.
“Ka Sur u Paidbah seng ka la wanrah mynshwa ia kane ka kam sha u Symbud Myntri Rangbah ka Jylla bad mynta ka pan jingiarap na u Myntri Rangbah ka Jylla ban pynsted ia ka jingtreikam” u la ong bad ula pynpaw ia ka jingkyrmen ba ka Sorkar kan shim khia kloi ban mynjur ia ka projek bad ban pyntyllun iaka kam shna ia ka surok ka ban ai jingmyntoi ia ki paidbah bad iaka thain baroh kawei.
Iaka Sur Paidbah South West Khasi Hills District, la wan synrang lang ruh da u MLA ka UDP na Mawkyrwat u Bah Renikton Lyngdoh Tongkhar bad u MLA ka Ranikor u Bah Pius Marwein kiba la pynpaw ka jingkyrmen halor ka jingthmu jong ka Sorkar ban pynroi ïa ki jingtei kongsan bad ki surok hapoh ka West Khasi Hills district.
Haba kren shaki lad pathai khubor u Bah Renikton Lyngdoh Tongkhar u la pynthikna ba ka jingshna ia ka surok Weiloi-Keniong kaba la mang tyngka naka World Bank kan pynpoi shaduh Ranikor.
“Ka Sorkar ka thmu ban sdang ia ka bynta ba nyngkong jong ka jingtei iaka surok kaata na Weiloi sha Keniong bad haka wat kaba ar yn pynpoi iaka surok sha Ranikor” ula ong.
U Bah Renik ula ong ba kane ka surok kan pynïasoh ïa ka Rilum Khasi bad ka South West Garo Hills district ka ban ai jingmyntoi ïa ki shnong haki thaiñ khappud.
Ula pyntip ba ka Sur Paidbah South West Khasi Hills District ka la kyntu ruh ïa u Myntri Rangbah ban shna ia ki katto katne ki surok naduh ki surok Rangdkhiew-Marngor, Jashier-Kynshi, bad Pyndendiwah-Shyrwan.
“U Myntri Rangbah ula kubur ia ka jingdonkam jong kine ki surok ha ka ban kyntiew ia ka roi ka par ha ki lai tylli ki District jong ka Khasi Hills” u la ong bad ula ïathuh baka Sorkar ka dang wad ki lad lynti ban ioh pisa na ka bynta kine ki projek.
Naka liang u MLA Ranikor u Bah Pius Marwein u la ong ba ki dang ap ia ka Sorkar ban khot tender ban sdang noh ban shna iaka surok.
U Bah Pius ula ong ba ki jingtyrwa na ka bynta ki surok ban pyniasoh ia ka Mawsynram sha Ranikor bad ia ka Wahkaji sha Ranikor ki dang iaid shakhmat, ha kaba ka Sorkar ka la rah ruh ïa kane ka kam ban ïakren bad ka Sorkar Pdeng.
Ula ong ba lada kine ki project surok kin urlong, kin iarap haka ban kyntiew ïa ka roi ka par bad iaki lad kamai hapoh ka thaiñ Khasi Hills.
.){kind=link}