Shillong, Lber 10 : Ka sorkar jylla ka la kyntu ia ka Ministry of Finance ka Sorkar Pdeng ba kan ym kynthup shuh ia ka Special Assistant to State on Capital Investment (SASCI)-ka ram khlem sut ba 50 snem- ha ka jingkhein ia ka jingduna pisa (fiscal deficit) jong ka Jylla.
Haba pyntip ïa kane ha ka jubab ia ka jingiatai halor ka mang tyngka hynne ka sngi Nyngkong, u Myntri Rangbah ka Jylla Conrad K Sangma ula ong “Ngi la dep thoh sha ka Ministry of Finance bad sha u AG ban kyrpad ïa ki ba kim dei ban kynthup lang ïa ka SASCI – ka pisa kaba ngi ïoh na kane ka ram khlem sut kaba 50 snem ha ka jingkhein ia ka fiscal deficit ka Jylla ( mynta u snem, ka Meghalaya kala shim T.2450 klur).”
“Ka (fiscal deficit) ka long 6.0% kat kum ka kaiphod jong ka Comptroller Auditor General of India (CAG) namar kam don ka jingbthah sha ki da ka Ministry of Fiannce ban nym kynthuh ia ka SASCI bad ki (CAG) kila kynthup ia ka SASCI ha ka jigkhein ia ka ram katba ka jingshisha ka dei ba ym dei ban khein” ula ong haba bynrap “Ka Myntri pla tyngka Ri kala kular ha nga ba kan sa iakren ia ki AG bad pyntip ha ki ba kane ka jingkhein ia ka SASCI kam dei ban kynthup ha ki ram bala shim da ki Sorkar Jylla”.
Kat kum ka jingong jong u, ka fiscal deficit (jingduna pisa) ha u 2023 ka kot 3.8%, ha u 2024 ka kot 3.5% bad ha u 2025 ka kot 2.6 % jong ka GSDP.
U Conrad ula ong ba ka SASCI ka lah ban dei kawei na ki lynti kaba paka bha ban beit ia ki Capital Investment Project.
“Namar watla ngi shim T.2450 klur mynta, kaba hap ban siew pat hadien 50 snem khlem sut, ka pisa la pynshongdor tang T.83 klur ia mynta. Kumta, kane ka dei kaba lynti ba itynnad eh ban bei tyngka bad ka Meghalaya ka dei kawei na ki Jylla ba pyntrei bha ha kane ka liang bad kumba nga ong, haba pynshong nongrim n aka CSF ngi la buh ia ka pisa kaba bun (T.5155 klur ha u 2075) ia ka Sorkar ha katei ka por ba kan siew pat ia ka trai (principal amount) ba shim hadien 50 snem” ula ong.
