Shillong, Nailur 12: Ka North Eastern Hill University Teachers’ Association (NEHUTA) hynne ka sngi Ba-ar, kala kyrpad ia ka President ka India ka Droupadi Murmu ba kan bthah ia u VC ka NEHU Prof. PS Shukla ba un weng mardor iaka jingpyntip (Notification) bala pynmih haka 12 Naitung, kaba bthah iaki College bala iasoh bad ka NEHU ba kin pyntreikam noh iaka National Education Policy (NEP) khlem ka jingmynjur naka Academic Council.
Haba phah iaka kaiphod halor ka jingpynkhein iaka NEHU Act, Statutes and Ordinances da u VC ka NEHU, u President ka NEHUTA Prof Lakhon Kma ula ong “Namar ka jingpynkhien kyndon ain da u VC ka NEHU u Prof. PS Shukla, ngi kyrpad ia ka Ophis jong phi kum ka Visitor ka University ba phin tuklar bad bthah ia u VC ban weng noh iaka Notification bala pynmih haka 12 tarik Naitung, ba bthah iaki Principal jong ki College namar kane ka long kaba la shu leh kyrkieh, ka bym shong ain, ba ialam bakla bad ka bym iahap, shuwa ba un nang pynjot ia ka NEHU”.
“Ngi dawa ba phin pynmih ia ka jingbthah khnang ban tehlakam ia u VC ba un leh donbor da kaba pyndonkam bakla iaka bor kum u VC bad kham kongsan eh ban iada ia ka NEHU bad ia ki statutory body kum ka Academic Council naka jingpynkhein ain bad jingpynhiar kyrdan ia ka pule ka dangle jong ka NEHU , ki College kiba la iasoh bad ka NEHU, ki samla kiba bun ki dei ki riewlum bad kham kongsan eh ia ka bha ka miat ka Jylla Meghalaya” ula ong.
U Prof Kma ula kynnoh ba u VC ula leh donbor ban phah pyntreikam iaka National Education Policy (NEP) naka bynta ki under-graduate level ha NEHU naduh 2023-24 kata ban sdang naduh 1 tarik Nailar 2023 tang daka shithi bala pynmih haka 12 tarik Naitung khlem ka jingmynjur naka Academic Council jong ka NEHU.
Ula iathuh ba haka jingialang jong ka 110th Academic Council kaba la long haka 19 tarik Jymmang 2023 bad haka 2 tarik Jylliew la mynjur iaka ‘draft amendment’ jong ka OC-8 governing naka bynta ka UG program hapoh ka NEP hynrei ha kine ki jingialang la mynjur tang iaka ‘draft amendment’ bad ka regulation RC-12 governing naka bynta ki Course Structure bad ki subject hynrei khlem la mynjur ban pyntreikam iaka NEP.
Shuwa ba kane ka Ordinance ba thymmai jong ka NEP yn dang ban iakren ha ka AC ba 110, ki samla pule kila dep ban shim Admission haki College ba iasoh bad ka NEHU daka ba jingmut ban iaid beit daka 3-years UG program ym daka 4-years UG program hapoh ka NEP.
Haba iadei bad ka jingthmu u VC ban pyntreikam iaka NEP naduh 2023-2024, iaka rai la pynliem daka Motion bala wanrah da u shongknor namar tang 5 ngut ki dkhot kiba la mynjur ban pyntreikam iaka NEP naduh 2023-2024 bad bun ngut ki dkhot kila mynjur ban pyntreikam iaka NEP naduh 2024-2025.
“U VC u pyrshang ban ialam bakla daka ba pynsaphriang iaki jingiatai bad ki Resolution bala shim hapoh ka jingialang jong ka Academic Council bad kane ka paw shai ba u VC u thmu ban ialam bakla bad ban leh donbor namar wat ki College hapoh Meghalaya kim pat kot bor ban pyntreikam iaka NEP naduh 2023-2024” ula ong.
