Shillong, Lber 26 : U Myntri ba khmih ia ka Tnad Food Civil Supplies & Consumer Affairs Bah Methodius Dkhar ula pyntip ba ula thoh sha ka Sorkar Pdeng ba kyrpad ban pynkiew haduh 50-60% ka jingpynpoi LPG sha Meghalaya, haba kdew ia ka jingkiew ki kam jngohkai bad ka shaniah tylli ha ka.
Haba kren sha ki nongthoh khubor ha ka sngi Palei, u Bah Dkhar ula ong “Ngi la thoh sha u Myntri ka Sorkar Pdeng ban pynkiew ia ka bhah ba ju ai sha ka Jylla, Dang mynshisngi bad mynnin ruh, ngi lah ioh kham biang ka jingpynpoi ia ki commercial cylinder, hynrei ngim shym la ioh ia kum kane ka jingpynpoi ba ngi ju ioh ha ki por ba jai jai”.
U Bah Moethodius ula batai ba watla kam pat don sati aka jingduna ki LPG ban pyndonkam ha ki thliew iing, hynrei kala don ka jingduna ka jingpynpoi ia ki commercial cylinder.
“Lada ngi donkam 100 cylinder, ngi ioh 100, hynrei ia mynta, la pynpoi duna da 20%. Kumta, lada don ka jingdonkam ba 100, mynta ngin ioh 20% na ka” ula ong.
U Bah Methodius ula pyntip ba ka Sorkar kala shim ia ki lad ki lynti ban pynthikna ba kam dei ban don ka jingthied ban pynlang ne die black haba iathuh ba ka Sorkar kala thung ia ki Committee ba khlieh da u Chief Secretary bad ki bor District ban peitthuh ia ka jinglong jingman.
“Kumba long mynta, ki don katto katne ki jingduna na ka bynta ki restaurant bad hotek, hynrei ka jinglong jingman kala kham biang haba ianujor bad ki ar-lai taiew bala lah. Nga ruh nga la shimkhia ban leh eiei bad ka Tnad ban pynbun ia ka jingpynpoi LPG” ula bynrap.
