Shillong, Nailur 30 : Ka Meghalaya ka dei ka Jylla kaba phra, kaba dawa ban pynkiew ia ka bhah khajna sha ka Jylla naka khajna ka Sorkar Pdeng ba sam sha ki Jylla (divisible pool) sha ka 50%.
Ka Sorkar Jylla hapoh ka jingialam u Myntri Rangbah Conrad K Sangma kala aiti ia ka jingtyrwa ba shongdor T.1.2lak klur ka grants-in-aid na ka bynta san snem ha ka jingialang bala pyniaid da u Chairman ka 16th Finance Commission Arvind Panagariya, kaba long hynne ka sngi Nyngkong ha Shillong.
Haba kren bad ki lad pathai khubor, u Panagariya ula ong “….Ka jingkwan ka Jylla ka long ban kyntiew ia ka bhah n aka divisible pool na ka 41% ba mynta sha ka 50%. Mynta, kane ka dei ka jingkhein ba ngi la iohsngew na kawei ka Jylla sha kawei pat bad la paw ba ha kylleng ki Jylla kala don ka jingiakwah lang ba ka jingsam ia ka khajna kan kiew na ka 41% sha ka 50%”.
Haba kylli la ki jingdawa jong ki Jylla ka long kaba lah ban pynurlong, u Chairman ula ong “Kane ka dei ka jingkylli kaba biang bha. Kane ka dei ka Jylla kaba phra bad ngi la iohsngew lah phra sniew ban pynkiew n aka 41% sha ka 50% na ka bhah khajna ka Sorkar Pdeng ban sam sha ki Jylla. Ha ka jingshisha, ka Commission ha ki snem bala leit kam pat ju shim ia kane ka jingpynkiew kaba heh (41% sha ka 50%) namar ka dei kaba la bun bha”.
U Chairman ula pyntip ruh ba ka Sorkar Jylla kala aiti ia ka jingtyrwa ba ai palat T.1.2 lak klur ka grant-in-aid na ka bynta ka 5 snem ban wan.
“Ka grant in-aid ka wan na ka consolidated fund jong ka Sorkar Pdeng. Kine ki dei kiba jyrwit jyrwat bha namar ia mynta hadien jong ka 14th Finance Commission, ka jingsam ia ka khajna ka Sorkar Pdeng ka long kaba la heh bha. Kumta ka Sorkar Pdeng kalapyndonkam iala ka bor la kan ai nala ka jong ka consolidated fund ne kan ai beit thik kat kum ki jingai jingmut jong ka Finance Commission” ula ong.
Hashuwa kane, u Chairman ula pyntip ba ka Commission kala sngewhun bha ia ki jingai jingbarai jong u Myntri Rangbah ka Jylla Conrad K Sangma ha ka por ba u ai jingkren.
“Ka Jylla kala ai ia ka jingbatai kaba biang palat” ula ong bad bynrap “ Ula pyni ia ka jingangnud bad ka jing shimkhia jong u halor ka roi ka par jong ka Jylla. Ngi la ihun bha ia kaei kaba ngi iohi. Ka jingbatai dalade ka dei kaba la biang pura. Kala kdup ia ki prokram bapher bapher kiba iadei bad ka jingdon ki nongshongshnong, ka geography bad ki kam jngohkai”.
Halor ka jingbatai ia ka Mission 10 jong ka Jylla, u Chairman ula ong “Kawei ka bynta jong ka jingbatai ka dei ka jingiakren halor ka mission 10 kaba ka Jylla kala don ia ka plan ba kynthup ia ki prokram ba ka kwah ban pyntreikam bad ki jingaiti lut jong ka na ka bynta ki paidbah ka Meghalaya nalor ka jingbuhthong ka Jylla ban kynjoh ia ka GDP ba 10 billion dollars hapoh u 2028, kaban wanrah ia ka per capita income ba jan kot ia ka 3000 dollar, kaba dei kaba biang palat”.
Ha kajuh ka por, u Panagariya ula ong ba ka Commission mynta ka dang don ha ka khep ka jingiakren bad ki Jylla lem bad ki kynhun bapher bapher.
“Ka Meghalaya ka dei ka Jylla ba 8 ba ngi la leit iuhkjat. Ngi la dep wan sha ki 7 tylli kiwei pat. Dang shen ngi la wan ha Assam bad ki Jylla ba marjan” ula ong.
