Shillong, Naiwieng 11: Namar ka jingsngewkhia ba bun ki samla ialehkai Cricket ki hap ban tynrong ia ka jingbahkhlieh ban bynta ia la ka por ha ka pule dangle bad ka por ialehkai bala buh da ka BCCI, ka Meghalaya Cricket Association kala kyrpad ia u Myntri Rangbah ka Jylla Conrad K Sangma, ban pynjynsur lem na ka bynta ki samla pule ba ialehkai cricket ba kin nym duh lad ban thoh ia ki eksamin.
Ka MCA hapoh ka jingialam u Honorary Secretary bah Rayonald Kharkamni, ki la ia kynduh ia u Myntri Rangbah Conrad K Sangma, bad aiti syndonda ka dorkhas, ia kaba la sakhi lang ruh da u nongaibuit bah Hamletson Dohling ba dei ruh u President ka Meghalaya Football Association bad kumjuh u bah Wailadmiki Shjylla, Myntri ba dei khmih ia Ka Tnat Sports & Youth Affairs.
Hadien ba la ioh ia ka jingpynshai, na ka liang u Myntri Rangbah, u kular ba un shimkhia ban leh eiei halor kane ka bynta, kaban long ruh kum shi bynta ban plie lad wat ia kiwei ki samla ialehkai.
Na ka liang ka MCA, ha ka shithi kaba ki la ai sha u bah Wailadmiki Shylla, ka pynpaw ba ki khynnah ialehkai cricket ba dang leit skul, ki donkam bha bunsien ban don ha ki prokram ia kilan bad hap ruh ban leit ialehkai shabar na ka jylla, kaba jia ryngkhat, kane ka ia takhuh bha khah khah bad ka jingpule ka jong ki, khamtam lei lei ki eksamin jong ki Board, kaba da kylla, kiba bun na ki khynnah ki mad ban shem jingeh ban lah ban pynbiang lang ia kine ha ka juh ka por.
Kumta ha kane ka shithi, ka MCA ka kyntu ia ka sorkar ba kan shong pyrkhat ne ban ailad ia ki khynnah ban shong da kawei pat ka eksam kaba kyrpang ia kaba lah ban pynlong ia ki ha ki sngi ki por ba kham shadien.
Ia kane ka mat, ka MCA ka la pynsngew ruh sha ka tnat pule puthi, ba na ka liang ka jong ka, ba kan iarap ba kan shim khia lem, ne ban da thaw syndon da ka mat treikam, kaban long kum shi bynta ban iarap ne ban kyrshan lem ia ki khynnah ba ialehkai kriket ha ka por ba ki mihkhmat ia ka jylla shabar na la ki iing.
