Shillong, Iaiong 10: Ka Khasi Students Union-Huroi Unit kala phah ia ka jingkyrpad sha ka Sorkar Jylla ba kan phaikhmat bad sha ka MLA ka Sutnga-Saipung ba kin ai jingiarap lem ia ki shnong khappud ka East Jaintia Hills kiba don markhap ka Bangladesh namar ka jingsniew palat jong ka surok, kaba la buh ia ki nongshongshnong ha ka jingeh ha baroh ki liang.
Ka KSU lyngba u President samla Wallam Lamin Gadew, kala iathuh ba ka surok kaba sniew ka dei naduh ka shnong Huroi, Lahalein, Lejri shaduh Sonapur.
Ka KSU ka pyntip ba ki nongshongshnong jong kine ki thain kila mad ia shibun ki jingeh la ka dei ha ka jingioh ia ki marbam mardih, ka leit ka wan khamtam ha ka pang ka shitom namar ka jingsniew ka surok shaba palat liam.
Ka ong ba ka jingsniew ka surok ka dei namar ka jingpyntrei thymmai ia ka surok haduh ba bun ki jaka kila long surok ktieh, kaba la ktah wat ia ka leit iew leit hat, leit wad dawai bad kiwei kiwei.
Ka KSU ka kyrpad ia ki bor khmih ba kin shimkhia ha kaban khmih kham kloi ia kine ki jingeh haba kyntu ia ka Tnad PWD ba kan phah noh mar mar da ki puh shilum ban khat bad pynkhuid ia ki ktieh kiba buh jingeh ia ka iaid ka ieng jong ki briew bad ki kali ruh kumjuh.
