Shillong Lber 30: Ka Jaintia Students’ Union (JSU) ha ka sngi Nyngkong, kala kyrpad ia u Lat ka Jylla CH Vijayashankar ban kyntu lem ia ka Sorkar Pdeng ba kan pyntreikam pura noh ia ka National Anti-Discrimination Law, ka ban tehlakam ia ki jingkren tohmet bad ki kam thombor pyrshah ia ki briew kiba na ka thain Shatei Lam Mihngi jong ka ri.
“Ngi lah kyntu ba dei ban shim noh mardor ia ki sienjam ban shimkhia ia kane ka jingkiew ki jingjia thombor pyrshah ia ki briew ka thain shatei lammihngi ha kylleng ki bynta jong ka ri bad ban pyntreikam pura ia ka National Anti-Discrimination Law ban pynthikna ia ka jingshngain, burom bad ia ka jingiada” ong u Nongaibuit ka JSU u A Suchiang hadien bala ai iaka dorkhas ha u Principal Secretary jong u Lat ka Jylla.
Ula ong, ba ki jingjia kum ka jingshah pyniap u Nido Tania, ka jingbym ai ka jingbishar kaba hok ia Angel Chakma bad ka jingjia kaba dang shen kaba 3 ngut ki kynthei na Arunachal Pradesh kila shah thombor kadei ka jingjia kaba long khah khah bad ka riti synshar ka ri hapoh jong ka Article 14 bad 15 kam shim la sangeh.
“Ka jinglong kaba iaryngkat lang kam dei ka jingioh bynta hynrei kadei ka hok ha ka riti synshar ka ri. Ka jingpynslem ban ai ka jingbishar kaba hok kadei ka jingpynduh noh ia ka hok” ong u Bah Suchiang.
Ka seng kala tyrwa ba dei ban pynshitom tyngeh ia kito kiba donkti ha kaban leh khnang da kaba set 6 bnai ia kiba kren tohmet da ka ktien, 3 snem ia kiba thombor ha kaban shoh pynmynsaw bad kala kyntu ba ka Sorkar Pdeng kadei ban leh mardor ha kaban pynthikna ia ka jingshngain bad ia ka burom jong ki nongshong shnong ka thain shatei lammihngi ha ka ri baroh kawei.
“Ngi tyrwa ba ka National Anti-Discrimination Law kadei ban kynthup ia ki kyndon kiba khlain bad kiba batai sbak ban tehlakam ia kitei ki jingleh bad ban ai ka jingbishar kaba mardor. Kine ki kynthup ia ka jingkren tohmet da ka ktien dei ban pynshitom da kaba set phatok haduh 6 bnai ryngkat bad ka dain kuna. Ka jingthombor da kaba shoh pynmynsaw namar ka jingisih jaidbynriew dei ban pynshitom da kaba set phatok haduh 3 snem ryngkat bad ka jingdain kuna. Ka jingthombor da kaba shim syndon ia ka jingim dei ban pynshitom da kaba set phatok shirta ka jingim ne ban phasi” ong u Bah Suchiang.
“Ngi ngeit skhem ba kum kane ka ain kan ym long tang ka jingtehlakam hynrei kan phah ruh ia ka kyrwoh kaba khlain ba ka jingthombor ne ka jingkren tohmet ia ki jaidbynriew kam don jaka satia ha kane ka ri kaba iar bad kaba bun ki jaidbynriew. Ngi kyntu ia ka Sorkar India ban leh da kaba shim ia ka rai kaba bniah bha bad ban batskhem ia ka riti synshar ka ri kaba kular ia ka jingryngkat kaba mar katjuh, burom bad ka jingbishar kaba hok ia baroh ki nongshong shnong kynthup ia kito kiba na ka thain shatei lammihngi ka ri” ula pynkut.
 ha ka sngi Nyngkong, kala kyrpad ia u Lat ka Jylla CH Vijayashankar ban kyntu lem ia ka Sorkar Pdeng ba kan pyntreikam pura noh ia ka National Anti-Discrimination Law, ka ban tehlakam ia ki jingkren tohmet bad ki kam thombor pyrshah ia ki briew kiba na ka thain Shatei Lam Mihngi jong ka ri.){kind=link}