Shillong, Nailur 24 : Ka Hynniewtrep Achik National Movement (HANM) hynne ka sngi saitjain, kala kyrpad ia ka seng Hynniewtrep National Liberation Council (HNLC) ban kynthup lang ia ka mat jingdawa pyntreikam ia ka Inner Line Permit (ILP), pynrung ia ka Ktien Khasi bad ka kam iakajia pud ha ki mat iakren iasuk bad ka Sorkar.
“Ngi kyrpad ia ka HNLC ban kynthup ia ka jingdawa pyntreikam ia ka ILP ha Jylla, ka jingpynrung ia ka Ktien Khasi ha ka khyrnit ba phra ka Riti Synshar ka Ri bad ka jingiapynbeit ia ka iakajia pud ha ki mat dawa jong ka ha ka jingiakren iasuk namar kine ki dei ki jingdawa bad jingangnud bala slem bha jong ki paidbah ka Jylla” ong u Bah Lamphrang Kharbani President ka HANM haba iakren bad ki nongthoh khubor.
U Bah Lamphrang ula ong ba ka Sorkar Jylla ka dei ruh ba kyrshan ia kine ki mat lada la kynthup lang ha ki mat jingdawa jong ka HNLC.
“Ngi sngew ba ka jingiakren kan kham shongkhia lada ia kine ki mat ruh la iakren ha ka miej iakren iasuk ki lai liang mamla kata hapdeng ka Sorkar India, ka Sorkar Jylla bad ka HNLC” ula ong.
Une u President ka HANM ula iaroh ruh ia ka rai jong ka Sorkar ban khot iakren iasuk bad ka HNLC haba ong ba kane kan wanrah shisha ia ka jingshongsuk ba neh shirta hangne ha Ri-lum Khasi bad Jaintia.
Kat kum ka jingong jong u, la thaw ia ka HNLC da kawei ka thong bad kata ka long ban iada ia ka bha ka miat jong ki paid Khasi bad Jaintia bad ka Jylla baroh kawei.
“Namar kata, ka jingiakren iasuk bad ka Sorkar Jylla lem bad ka Sorkar Pdeng ka dei ban long na ka bynta ka jingmyntoi bad ka bha ka miat jong ka Jylla Meghalaya bad ki trai muluk” ula bynrap.
