Kyrpad ka CPC ia ka Sorkar India ban shimkhia ia jingshah thombor ki Hindu ha Bangladesh

Shillong, Nailar 09: Ka Central Puja Committee (CPC), Meghalaya kala kyntu ia ka Sorkar Pdeng ban iakren bad ka Sorkar Bangladesh ryngkat bad ka United Nation Organisations (UNO) halor ka jingpynkheiñ kaba jur ia ka hok longbriew manbriew jong ki ritpaid Hindu bad kiwei kiwei ki kynhun niam ha Bangladesh.

Katkum ka kyrwoh khubor na ka CPC kala ong, “Haba pynrem ia ki jingjia kiba sngewsih – ka jingpynshitom bad jingthombor beiñ ia ki briew kiba dei ki ritpaid Hindu ryngkat ka jingpynjulor ia ki jaka mane niam bad ki Temple Hindu, ka Central Puja Committee, Meghalaya ka kyrpad ia ka Sorkar India ban pynsngew sha ka sorkar Bangladesh bad ia ka UNO ban leh eiei halor ka jingpynkheiñ palat pud ïa ka hok longbriew manbriew ki riewngeit Hindu bad kiwei kiwei ki kynhun niam, kiba mad ïa ka jingshah pynïap dusmon ha ki riewshit niam ka Islam bad ban pynthikna ïa ka jingshngaiñ bad jingiada ia ki kynhun ritpaid Hindu ha katei ka ri.”

Ka CPC ka la kynnoh ruh ba kumno ki riewshit niam Islam kila ioh ban knieh iaka jingiakhih jong ki samla pule da kaba thombor pat ïa ki riewngeit Hindu kiba dei ki ritpaid bad kila pynjulor ruh ïa ki jaka mane jong ki Hindu bad thang ruh ïa ki ïing ki sem jong ki ritpaid Hindu kiba don ha ri Bangladesh.