Kyrpad ka BJP ia ka HNLC ban nym weng noh ialade na ka jingiakren iasuk ka BJP ia ka HNLC ban nym weng noh ialade na ka jingiakren iasuk

Shillong, K’lyngkot 04 : Ka Bharatiya Janata Party (BJP) ha ka sngi Palei, kala kyrpad ia ka seng Hynniewtrep National Liberation Council (HNLC) ba kan pynkylla biang ia ka rai ban weng noh ialade na ka jingiakren iasuk bad ka Sorkar Pdeng lem bad ka Sorkar Jylla khnang ba kan neh ka jingsuk hapoh ka Jylla.

Haba kren sha ki lad pathai khubor, u National Vice President ka BJP ba khmih ia ka Meghalaya Cr Chuba Ao ula ong “Ngi kyrpad ia ka seng kaikhlaw jong ngi ba kin wan sahkhmat bad imlang noh ha ka imlang sahlang ban ioh ia ka jingsuk”.

U President ka BJP Meghalaya Rikman G Momin ula ong “Ngi donkam ia ka jingsuk bad kumta ngi kyrpad ia ka HNLC ba kan wan shakhmat ban ioh ia ka jingiakren iasuk bad ka Sorkar Jylla bad Sorkar Pdeng”.

Hynrei ula kyntait pat ban kynthoh eiei la kan don ne em ka jingmap noh ia ki nongialam bad ki dkhot jong kane ka seng kiengatiar ka Ri-lum Khasi.

U Nongaiktien ka BJP bad Ophis IPS barim Bah M Kharkrang ula ong ba ka Party ka kyndit halor ka rai ba kynsan kynsan jong ka HNLC ban weng noh ialade na ka jingiakren iasuk bad ka Sorkar. Kat kum ka jingong jong u, kam long kaba suk ia ka Sorkar bad tang ha shikulom ban wen glut ia baroh ki case pyrshah ia ki Nongialam bad ki dkhot ka kynhun.

“Lada phi la iohi ia ki jingkren….ka mat ba hakhmat eh jong ka HNLC ka long ban weng noh ia baroh ki case pyrshah ia ki Nongialam bad ki dkhot ka kynhun. Nga sngew ba kila dei ban ap shuwa namar kam long kaba suk ia ka Sorkar ban shu weng noh ia ki case khamtam lada ki case ki dei kiba la chargesheet bad kiba la don hapoh ka jingbishar ka Iingkasahri , naba shisien bala chargesheet, ka shong ha ka Iingkashari. Ban ong ba ka Sorkar tang ha ka shi kulom kan weng lut ia baroh ki case ka dei ka bym lah long” ula ong.

“Ha kajuh ka por, ngi hap ruh ban pyrkhat ia kito ki lanot jong kine ki case, ki lah ban dei ki bahaiing hasem ne na ka long iing jong phi…mynta lad aka Sorkar ka pynsngewbha tang shiliang, wen glut ia baroh ki case, kaei ka jingbishar hok kaba phin ai sha ki lanot jong kine ki kam bymman” ula bynrap.

U Bah Kharkrang ula ong ba ka dei ka rai kyrkieh n aka liang jong ka HNLC ban weng noh ialade n aka jingiakren iasuk bad bynrap “Kila dei ban ailad ia ka jingiakren iasuk ba kan iaid shuwa”.

Halor ka jingkylli, une u Ophisar IPS barim ula ong “Ngi kyntu ia ka HNLC ba kan bteng shuwa ia ka jingiakren iasuk bad ha kum kane ka khep, ka dei ka jingai bad jingshim, phim lah ban shu dawa bad khmih lynti ban pyntreikam ia baroh ki jingdawa da ka Sorkar. Phi hap ban khmih jngai ym tang namar ba ym pat pynbeit ia kawei ka ishu, kam mut ba phin shu weng noh ialade n aka jingiakren iasuk”.