Shillong, Rymphang 06: U Nongialam ka PDF bad Myntri Sorkar u Bah Banteidor Lyngdoh hynne ka sngi ula ong ba ka seng ka don iaka lad kaba biang bha ban jop haduh 7 ne 8 tylli ki seat ha kane ka elekshon MLA 2023.
“Ngi kwah ba ka jylla jong ngi kan long kaba lait na ki kam bamsap namar ba ngi dang sahdien ha baroh ki liang ha kaba iadei bad ka roi ka par, kumta dei na kane ka daw ba ka PDF ka don ia ka kabu kaba biang bha ban jop ha ki 7 ne 8 tylli ki constituency” ong u Bah Banteidor hadien ba ula dep ban thep kyrteng ban iakhun iaka elekshon na Mawkynrew Constituency.
Ha katei ka jingleit thep kyrteng la synran ia u Bah Banteidor da ka kurim ka jongu, ki nongialam bad da ki paid nongkyrshan.
Ula ong, ka seng ka jongu kala trei shitom bha lyngba ka tnad ïalehkai bad ka tnad ka rep ka riang ban wanrah iaka jingkylla n aka bynta ka bha ka miat jong u paidbah.
Halor ka jingshah kynthoh ba ka sorkar MDA kala pulom ha baroh ki liang, u Bah Banteidor ula ong ka PDF kam shym la pulom ha kaban ai jingshakri ia ki paidbah ka jylla.
“Ngi ia donlang haka sorkar hynrei ngim shym la pulom pat. Phi lah iohi hi ia kaei kaba ngi lah leh na ka bynta ki paidbah ka jylla” ula ong.
Halor ka jingkynnoh baka NPP kala pyndonkam bakla iaka skhim FOCUS, u nongialam ka PDF ula ong, baroh kin shim halade ia ka burom, hynrei ki briew ki tip pat mano ba la trei ia ka kam.
“Ngi ia donlang haka sorkar synroplang, u Myntri Rangbah ruh u donlang, hynrei nga la trei iala ka jong ka bynta ban wanrah iaka jingkylla. Hadien katno snem, ngi la lah ban pynlong biang iaka Meghalaya Games bad ka long kaba bha na ki ba bha tam bad ngi la pynlong ruh iaka Olympic Games,” ong u Bah Banteidor.
U la pynpaw iaka jingskhem jingmut ba yn shah jied biang kum u MLA ka Mawkynrew.
“100 na ka 100 nga skhem jingmut bha ba ngan wanphai biang namar ki paidbah kila iohi ia kaei kaba nga lah leh ha kine ki 5 snem kiba la dep” ula ong.
Ula ong, ka jingpyndonkam iaka bor tyngka ka ktah ia man la ki elekshon hynrei ha kane ka kynti kaba mynta ka bor jong ka pisa kan ym treikam satia namar ba ki paidbah kila ngiah.
Ha kaba iadei bad ka jingtyrwa ka NPP ia u T.5 Klur ban pyniasoh noh bad ka NPP, u Bah Lyngdoh ula ong “Kane kadei kaei kaei kaba ki paidbah ki iakren ha baroh kawei ka jylla bad ki tip ruh mano ba la tyrwa ia katei ka pisa bad mani kita kiba la shah tyrwa da ka pisa. Kan shong ha kita hynrei nga lah dep ban kdew bad ban kren pyrshah ia ki kam bamsap bad ngi kwah ban iohi noh ia ka jylla kaba lait naka kam bamsap hadien kane ka elekshon”.
