Shillong, Iaiong 19: U Managing Director (MD) ka Meghalaya Energy Corporation Limited (MeELC) uSanjay Goyal hynne ka sngi ula ong ba kan sa don ka jingkylla haba iadei bad ka jingpynlip bording ba 8-9 kynta mynla ka sngi namar ka tnat ka dang wad ia ki lad ki lynti kumno ban pynjynsur ia ka jingpynlip bording.
“Nga kwah ban pyntip sha ki paidbah ba ka jingpynlip bording kan sa lait noh suki suki ha ki sngi ban wan” ong u Goyal haba kylli kumno ka tnat kan leh naka bynta ban pyllait iaki paidbah naka jingeh namar ka jingpynlip bording kumba 8-9 kynta man ka sngi.
U Goyal ula ong ba ka tnat kan don jingkyrmen ban ioh bording na kiwei pat ki kompeni pynmih bad sam bording bad ka kyrmen ruh ba shen ka aiom lyiur kan sa wan noh bad lada u slap un wan noh ha kine ki sngi ban wan, ka Myntdu Leshka ruh kan lah ban treikam noh bad kane ka pyllait naka jingpynlip bording.
Ula kyntu iaki paidbah ban long kiba iai shah bad kin long kiba sngewthuh namar ka jylla mynta ka kynti ka dang don hapdeng ka jingeh ban ioh bording bad naka liang ka MeECL ka ialeh katba lah ban lah ban weng noh iaka jingpynlip bording.
U Goyal ula kubur ba ka don ka jingiapher hapdeng ka jinglah ka jylla ban pynmih bording bad ka jingdawa bording bad kane kadei kawei ka daw ban pynlong iaka Jylla ban mad ia ka jingkyrduh bording mynta ka kynti.
“Ka jingdawa bording ka long kumba 250 MW bad ka jylla ka lah ban pynmih bording tang kumba 170 MW lada khien lang iaka jingioh bording na kiwei ki kompeni kum ka NEEPCO, NTPC bad napoh ka nongbah Agartala” la ong u Goyal.
U Goyal ula ong ba ka tnat ka ialeh katba lah ban thied bording na kiwei pat hynrei namar ba ka dor ka long kaba rem, ka tnat kam banse ban shim iaka sienjam ban pynlip bording katba kam pat lah ban thied bording.
Ula ong ba watla ka tnat ka pynlip bording kumba 8-9 kynta ha ka shi sngi hynrei ka ialeh katba lah ban pynduna iaki kynta bad ka don jingkyrmen ba ki sngi ban wan kane kan urlong.
U MD ka MeECL ula kubur ruh ba ka jingduna bording ka jylla kadei namar ka jingbym lah treikam ka Myntdu Leshka Hydro Electric Project ha ki 5-6 sngi bala leit noh bad ka jingduna bording kadei ruh namar ka jingtyrkhong um ka Dam Umiam namar mynta ka dang dei ka aiom tyrkhong.
U Goyal ula ong ba ka tnat kum shi bynta ban pynbiang iaka jingdon bording hapoh ka jylla, kala ialeh ruh ban thied haduh T.8 ka bording watla ka dor kadei tang T.3 haduh T.4.5 khamtam haka por ba ka jingpynmih bording ka long kaba pahuh.
“Ka tnat ka ialeh katba lah ban pynthikna ba kan nym don ka jingpynlip bording haka por janmiet namar ha kane ka por kadei ka por ba ka bording ka pahuh bha na kiwei ki kompeni ba die bording bad naka liang ka tnat ka ialeh katba lah ban thied bording naka bynta ban pynbiang iaki paidbah” ula ong.
Haba kylli hato kane kam dei namar ka jingbym lah treikam ka tnat sam bording, u MD ka MeECL ula ong ba ka long kaba suk ban shu kynnoh hynrei dei ruh ban sngewthuh ba ka Meghalaya ka don tang kawei ka Dam Umiam ba pynmih bording kaba kham pahuh um, hynrei haka por ka aiom tyrkhong um kum ha u bnai Iaiong, kane ka Dam ruh ka duna ka jingpynmih bording namar ka jingduna um.
U Goyal ula ong ba watla ki 3 tylli Unit ka Myntdu Leshka ruh ki treikam bha ha ka por lyiur namar ka jingpahuh um hynrei kane ruh ka lah ban pynmih tang kumba 126 MW ka bording.
