Shillong Naitung 28: U Nongialam ka United Democratic Party (UDP) bad Myntri ka Sorkar Bah Kyrmen Shylla ula pynpaw ia ka jingkshem jingmut ba ka Meghalaya Land Transfer Act bad ka Sixth Schedule kila ai ka jingiada na ka jingwan tuid jong ki briew kiba nabar. Kine ki jingai jingiada kila buh ha ka jingeh ia ki bar jylla ban thied ia ka jaka ha ka jylla khlem da don ia ki kot ki sla kiba biang.
“Ha kaba iadei bad ka jingwan tuid ki briew kiba nabar, ngi long kiba la kyrkhu ban don ia ka Land Transfer Act bad ka Sixth Schedule ha kaba kino kino ki briew kiba nabar ki kwah ban wan bad ban sah ha ka jylla jong ngi, kaba kongsan tam ka long ba kidei ban don ia ki kot ki sla kiba biang. Khamtam eh lada kidei ki bar jylla ka long kaba eh bha ia ki ban wan ne ban klun ia ki jaka jong ngi namar ba ngi dei kiba lah ioh ia ka jingiada” la ong u Bah Shylla haba iakren bad ki nongthoh khubor.
“Ym lah ban len, ngi kwah ban ioh shuh shuh ia ki jingiada, la ka dei ka Inner Line Permit (ILP) ne ka Meghalaya Residents Safety and Security Act (MRSSA) ne kino kino kiban ioh jingiada. Ngi donkam shisha ia katta hynrei ia mynta, ngim donkam ban sheptieng namar ba ngi lah don ia kitei ki jingiada khamtam eh ka Land Transfer Act,” ula ong haba banjur ia ka jingkongsan pat ban long kiba husiar bha ban tehlakam ia ka jingwan rung jong ki briew kiba nabar shapoh ka jylla.
Ha kawei pat ka liang, u Bah Shylla ula lap ia ki jingdkoh ha ki lad ban iada na ka jingwan rung jong ki briew kiba nabar, da kaba pynapw ba ka jingiashong kurim hapdeng ki briew kiba nabar bad ki nongshong shnong ka jylla bad kane kadei kawei na ki lad ia ki bym dei ki trai jylla ban ioh lad ban rung shapoh ka jylla. Katkum ka jingong ka jong u, ia kane ka mat lah ban shimkhia lada ka imlang sahlang ka iatreilang ban iada na kitei ki jingjia.
“Kumba nga lah ju kdew na ka por sha ka por, ka jingdkoh kadei kata ba lada don kino kino kiba wan sha ki jaka jong ngi bad ki ioh ban iashong kurom ia ki hynmen ki para kynthei ki jong ngi bad kane kadei kata ka lad kaba ki ioh ban rung bad kane kadei ka bynta kaba eh bha ia ngi ban leh eiei. Lada ngi baroh ngi iatreilang bad ngim ailad ia ki, kata kadei ka jingiada kaba ngi don” ula ong.
Ha kaba iadei bad ka jingkyndang ka Assam ia ki mynder ri bad ka jingdon ia ka jingsheptieng ba kine ki lah ban wan rung pat sha ka jylla Meghalaya, u Bah Shylla ula banjur ia ka jingdonkam ban pynjur ia ki lad jingpahara ym tang ha East Jaintia Hills hynrei ha ka jylla hi baroh kawei.
U Myntri Sorkar ula pynpaw ia ka jingngeit kaba skhem ha ki ophis treikam kiba la don lypa ha ka jylla, ki tnad sorkar, ki pulit bad ki bor pyniaid district ban iada ia ka bha ka miat jong ka jylla.
Halor ka jingdonkam ban pynkhlain ia ki Infiltration Check Gates, u Bah Shylla ula ong, “Ka sorkar ka dang pyrshang shisha ia katei. Kam long kaba donkam ia nga ban ai da ka jingthoh halor kane ka bynta, namar ba ka sorkar kala dep ban pyrshang katba lah bad ka tnad ka dang khmih ia kane ka bynta. Nga ngeit ba kaei kaei kaba ngi lad don lypa mynta, kan long kaba lah biang ia mynta”.