Nongstoiñ, Ïaiong 25: U Trai jong ka jaka bala ai sngewbha ban shna ia ka Polytechnic ha West Khasi Hills, Bah S Phrelington Dkhar, ula kyntu ia u MLA ka Nongstoin ba un tuklar lem halor ka jingsahkut kane ka jingtei mynta la jan dap lai snem ha shnong Mawrusyiar, Nongstoin.
Une u Rangbah uba dei u Sordar Shnong barim ka Mawrusyiar haba iakren bad Ka Shlem hynne ka sngi Ba-ar, ula pynpaw ia ka jingbynniaw ba ka Sorkar kala shu pynsahteng ia ka jingtei khlem da don shuh ki ban shimkhia ha kaban pyndep.
Kat kum ka jingong jong u, ula pyrshang ban wad ia ki contractor kiba pyntrei ia ka kam hynrei um shym la lap satia shano ba ki don bad um tip ruh ia ki daw balei ba kila shu ieh shiteng ia kane ka kam, kaban wanrah shibun ki jingmyntoi ia ki khun samla ka thain.
“Arngut ki contractor kila ieh ia kane ka jingtei naduh u snem 2020 bad na kaei kaba nga tip, ka long ba ka Sorkar ka khlem siew thikna ia ka pisa sha ki. Imar ka dei kane ka daw ba kim shym la wan mih shuh bad shu ieh noh ia kane ka jingtei” ula ong.
“Hooid ha u 2020 kala don ka jingkhangdam namar ka khlam Covid-19 hynrei wat hadien bala ailad biang ia ka trei ka ktah, ki nongtrei ne wat ki contract ki khlem wan mih shuh haduh mynta mynne” ula bynrap.
U Bah Dkhar ula ong ba ha ka jingpeit jong u, ka jingtei kala dep kumba 85% eiei bad kaba sah ka long satang ban pynbit pynbiang ia ki jingdonkam kynthup ia ka bording, ka um bad ka surok.
U Bah Dkhar u pyntip ba ia kane ka jaka la ai sngewbha sha ka Sorkar Jylla naduh u snem 2013 hadien ba la iasoi soskular bad ka Tnad pule puthi ba kan pynrung kam ia ki bahaiing hasem jong u. U pyntip ba ha katei ka snem, ka Sorkar kala pyndep ruh ia ka jingleh sorjamin.
Une u Rangbah ula kyntu ia u MLA ka Nongstoin Bah Gabriel Wahlang ba un tuklar lem halor kane ka kam bad ban tynruh ia ka Sorkar Jylla ba kan phah pyndep noh ia ka jingtei khnang ba kan ai jingmyntoi ia ki samla ka District.
