Nongstoiñ, Nailur 22: “Lada ka sorkar bad ki bor pynïaid District jong ka West Khasi Hills kiba dei peit ïa ka election, kim lah ban leh ei ei ïa ki nongshong shnong ha khappud kiba ju leit thep vote ha Assam bad Meghalaya, ka jingïakren pynbeit pud kan ym poi shano shano ruh”, ong u bah P.Nongshlong sordar ka shnong Mawïamsyiem kaba doh shaphang shatei na Langpih ha syndah bad ka jylla Assam.
Utei u Sordar u la ong ruh ba naduh ba u dang sdang ban leit shong shnong ha katei ka jaka, um shym pat la lah ban pyn thikna ba ki don shibun ki nongshong shnong ka thaiñ kiba thep vote lang ha Assam bad ha Meghalaya.
Hynrei dang shen, u la lap ia ka jingdon da ki spah ngut ki nongshongshnong kiba don ia artylli ki Election Photo Identity Card kawei jong ka Assam bad kawei jong ka Meghalaya.
“Nga la pynlong ia ka jingtohkit na ki Nongshongshnong bad da ka jingpyntieng ban khot ia ki briew ka Ain, ki nongshong shnong kila phla bad kila sei madan ia kine ki EPIC ba ki don kyrteng ha Meghalaya bad Assam ruh kumjuh” ula ong.
Kat kum ka jingong jong u, ka jingiakynnoh kyntur pud mar kylliang hapdeng ka Assam bad Meghalaya ka dei kaba mih na ki paid nongshongshnong hi kiba la thaw hi ia kine ki jingiakajia bad ka jinglong armaloi ka dei kaba hakhmat eh.
“Jin ba ki nongshongshnong kim pdiang ia ki jingmyntoi ba ka Sorkar Assam ka tyrwa, kan ym nud ban tam pud bad ban kam ia ka thain ba hap hapoh u pud u sam jong ka” ong u Bah Nongshlong.
Kum ka sienjan ba nyngkong ban lah pynbeit noh ia ka jingiakajia pud, une u Nongialam Shnong ula kyntu ia u District Election Officer ka West Khasi Hills, ba u dei ban leh ei ei ïa kitei ki ar maloi shuwa ka election ka ban long ha u 2023.
“Ka sorkar ka la dei ban pynkloi katba lah ban khot ïa kitei ki briew ba kin wan ai ka jubab kaba shai lada ki kwah ban sah ha West Khasi Hills, ki dei ban phah weng noh ïa ki kyrteng kiba la pynrung ha ka Assam. Lada ki kwah ban sah ha Meghalaya bad lada ki kwah ban leit sha Assam ruh kin jubab da kaba shai, khnang ba kin weng noh ïa ki kyrteng jong ki na ka thup jong ka Electoral roll” ula ong.
