Shillong, Iaiong 04: U Myntri Rangbah ka jylla u Conrad K. Sangma, haba ai jingkren ha ka Convocation kaba 16 jongka IIM Shillong kaba la long hynne ka sngi Thohdieng, ula kyntu ia ki samla pule ba kin shim ia ka jingim kum ka jing ia mareh thong (Marathon), kaba don iaka jingskhem jingmut, ka jingiaishah bad ka jingaiti lut ia kaei kaei kaba ki sngewtynnad.
“Kane kadei ka marathon. Wat ailad ba kano kano kan pynthud noh ia phi. Haba phi iaid shakhmat ha ka jingim, phin mad ia ki jingeh bad ia ki jingtynjuh kiba bun jait. Kane kadei ka khyllipmat kaba kongsan bad kumno phi leh ia ka, kadei kaei kaei kaban batai ia ka jingiaid lynti ka jong phi” ula ong.
Da kaba pynkynmaw ia kaei kaba ula mad, u Myntri Rangbah ula ong, “Nga kynmaw haba nga ieng hadien ba la pyndep ia ka jingpule ka jong nga (graduation), ngam long uba thikna ia kaei kaba ngan leh hadien kane. Hynrei tang kawei kaei kaba nga la ioh jinghikai ha ka jingiaid lynti ka jong nga, ka long ba ka jingim kam dei satia tang na ka bynta kawei ka khyllipmat ne jingjia, hynrei ka long na ka bynta ka jingiaid lynti ha baroh kawei”.
Ula pynpaw ruh halor ka jingmad ia ka jingrem ha ka elekshon kaba ula iakhun bad kumno ula lah pat ban pynkylla na ka jingrem sha ka jingai mynsiem ban poi sha ka jingjop
“Nga la rem ha ka elekshon kaba nyngkong, hynrei nga la ioh jinghikai pat na ka jingpulom ka jong nga. Hadien nga lah jop, nga lah long u MP, u MLA, u Myntri ka tnad Pla Tyngka bad mynta kum u Myntri Rangbah. Ka jingshim ia ka rai kaba kongsan tam ha ka jingim ka long kaba eh tam, hynrei haba phi bud ia la ka jingngeit kaba don ha ka dohnud bad leh ia kaei kaei kaba phi da ngeit shisha, kumta ka jingiaid lynti ka long kaba don jingmut”.
Haba kren halor ka jingiaid shaphrang jong ka ioh ka kot ka Meghalaya, ula kren bniah halor kane ka bynta.
“Ka GDP ka jong ngi kala roi na ka T.9,000 Klur sha ka T.30,000 Klur tang hapoh jong ki 3 snem. Ka jingwan kynshew tyngka kala kiew lai shah bad ia ka jingpynlut pynsep jong ka sorkar jylla la pyniaid ha ki liang kiba kongsan kiba la wanrah ia ki jingkylla kiba khraw” ula ong.
“Phi rung sha ka pyrthei jong ka jingkylla kaba sted bha, hynrei hapoh jong kine ki jingkylla ki don pat ki kabu kiba khraw. Ki jingmut jingpyrkhat kiba khraw tam kim dei tang da kaba trei shitom bad ba stad, hynrei kidei kito kiba pdiang ia ki jingeh bad kiba thaw pat ia ki lad ki lynti”.
Haba kren shaphang ka jinglong nongialam bad ka jinglong briew, u Myntri Rangbah ula ong “Kam myntoi lada phi stad katno katno ruh ne phi pyndep ia ka jingpule na kano kano ka jaka pule, ha kaba kut ka sngi hi, kadei ka jinglong briew kaba long kongsan tam hi. Ka jingrkhie ne ka jingleh bha kan pynkylla ia ka jingim briew”.
Ula aiti ruh ia ki takma sha ki samla pule kiba la wan shakhmat.
U Conrad ula pynkynmaw ïa ki sngi hadien ba ula pyndep ia ka jingpule na ka Wharton School, ula ong, “Haba nga la wanphai sha Meghalaya, nga la pynlut por shi bnai ban pule ïa ki polisi treikam jong ka jylla bad nga la shem ba ki ïapher bha na kiwei pat ki ri kiba la kiew sted bha. Ka jingwad bniah ka jong nga ha ka jingpule kadei kaba nga la pynleit jingmut bha ha ka jingsynshar khaddar bad ka jingplie lad halor ka ioh ka kot bad hadien 15 snem, kum u Myntri Rangbah, nga la shem ba nga la pyntreikam ia kiba bun na kitei ki jingmut jingpyrkhat na ka jingthoh ka jong nga ha ka jingpule.”
Ula ong, ba ka jingpule jongu kala banjur ba ka bynta jong ka sorkar kadei ban long kaba rit hynrei kaba heh pat ha kaban plie ia ki lad, ban pynthikna ba ka jingtreikam kan long kaba iaid beit iaid ryntih ban kyntiew ia ka ioh ka kot.
“Kala kdew ïa ka jingdonkam jong ka jingsengkam sengjam kaban ialam bad kyntiew ïa ka ïoh ka kot bad ia ka jingdonkam ban thaw ïa ka sawdong sawkun kaba biang na ka bynta ki nongseng kam lajong. Ka sengkam sengjam ka don ha ki kyrdan bapher, la ka long ka kam kaba heh, ka karkhana kaba rit ban pynmih ia ki marbam lane ki kynhun Cooperative, Hynrei ka mynsiem jong ka jingsengkam sengjam ka long kaba donkam shisha” ula ong.
Ula pyntip ruh ha ka jingialang ba ki jingmut jingpyrkhat, ki jingpule jongu ha ka Business School ula lah ban pynwandur ia ki polisi, ia kaba ula pyntreikam.
“Wat ju kheiñ sting ïa ka jingkordor jong ki jingïakren, ki jingïakynduh bad ka jingioh ia ka lad ban ïoh ha ka jaka pule kaba pawnam kum ka IIM Shillong. Ka jingnang jingstad kaba phi ïoh hangne ka don ia ka jingmut kaba khraw na ka bynta ka lawei ka jong phi, kumba kala long ia nga ruh”, ula bynrap.
U President jongka Honeywell India u Ashish Modi, u Chairman jongka Board of Governors ka IIM Shillong u Shishir Kumar Bajoria bad u Director ka IIM Shillong u Prof D P Goyal kila iadonlang bad kila ai jingkren ruh ha kane ka jingialang.
, kaba don iaka jingskhem jingmut, ka jingiaishah bad ka jingaiti lut ia kaei kaei kaba ki sngewtynnad.){kind=link}