Shillong, Naitung 19 : U MLA ka Shillong North, Bah Adelbert Nongrum u la kyntu ia ka sorkar jylla ba kadei ban khot ia ki nonghikai SSA sha ka miej jingiakren na ka bynta ban pynbeit bad pynurlong noh ia ki jingdawa jong ki.
“Lada ka sorkar ka lah, kadei ban pynpaw bad lada kam lah kadei ban kren shai,” u la ong haba kren bad ki lad pathai khubor.
Nalorkata, u ong ruh ba kum u nongmihkhmat u pang ka mynsiem ban ïohi ia ki nonghikai kiba dei ki hynmen para, ki khun ki pyrsa ba ki hap ban ieh ia ka ïing ka sem ban wan dawa ia ka tulop kaba ki shah bat mynta la san bnai mynta.
Katei ka jingkren jong utei u MLA kadei hadien ba da ki spah ngut ki nonghikai ki la mih ban shong kyllain myngor bad sah miet syndon hakhmat ka Ophis Additional Secretariat hadien ba ka jingiakren bad ka sorkar ha ka sngi Nyngkong kam shym la long kaba seisoh.
Lah ban kdew hangne ba ki don haduh 1200 tam ki nonghikai SSA ha ka jylla hapoh ka lama jong ka Meghalaya SSA School Association kiba dawa na ka sorkar ban pyllait noh ia ka tulop kaba la sahkut mynta la san bnai.
Kawei pat ka jingdawa ka long ban kyntiew noh ia ka tulop bad ruh ban ithuh noh ia ki kum ki nongtrei ba pura jong ka sorkar jylla.
