Shillong, Lber 11 : U Symbud Myntri Rangbah ba khmih ia ki kam Pohiing bad District Council Affairs (DCA) Bah Prestone Tynsong, ula kyntu ia ki paidbah ka ri-lum Garo ba kin ialong jai jai noh namar ka Sorkar kala shim ia ka rai ban pynkynriah shuwa ia ka elekshon GHADC, kaba la buh ban long ha ka 10 tarik Iaiong.
“Ka jinglong jingman kaba long mynta ha ri-lum Garo ka long kaba la shyrkhei bha hadien ka jingiakynad kaba mih ha ki jaka them ka WGH” ong u Bah Prestone haba iakren bad ki nongthoh khubor hadien ka video conference bad u Myntri Rangbah Conrad K Sangma ha ka sngi Balang.
U Bah Prestone ula pyntip ba ka Sorkar Jylla kan sa shong ia ka jingialang jong ka Kynhun Myntri lashai ka sngi Palei ha ka por 5 baje janmiet, ban iakren shuh shuh halor ki sienjam ba dei ban leh.
Ula kyntu ia ki nongshongshnong ka ri-lum Garo- ki riewlum bad ki bar jylla- ba kin ialong jai jai noh bad khot ia ki kynhun bapher bapher ban iakren ia ki jingeh kiba mih bad ban ai ia pynpaw ia ki jingsngew bad ki jingai jingmut.
“Nga kyrpad ia baroh ba kin ialong jai jai noh naba ka Sorkar kala shim ia ka rai ban pynkynriah shuwa ia ka elekshon” ong u Bah Prestone haba bynrap “Ha kane ka por, nga kwah ban khot ia baroh ki kynhun ba kin wan shakhmat bad ban pynpaw ia ki jingsngew bad ki jingai jingmut bad ngi long kiba kloi ban nang iakren shuh shuh bad baroh. Na ka liang ka Sorkar hi, nga kyrpad ia baroh ki Sengbhalang bad ki nongshongshnong ka ri-lum Garo la ka dei ki riewlum ne ki bar jylla ba kin sngewbha ban ialong jai jai noh bad ai ba ka shongsuk shongsain kan wan phai biang”.
U Bah Prestone ula pynpaw ia ka jingbym sngewtynnad halor ki jingjia thombor, kynthup kawei ia ka Ophis ka NPP ha Tura bad kyntu ia ki Sengbhalang ba kin iarap ban wanrah biang ia ka jingshongsuk.
U bah Prestone ula mynjur ia ka hukum ka Iingkashari ba khein iap ia ka jingpynbna ka GHADC halor ka syrnot Scheduled Tribe, haba ing ba ka Executive Committee kam shym la iaid kat kum ki kyndon da kaba iaid lait ia ka jingmynjur ka Iingdorbar Thaw Ain bad ka jingai jingmynjur u Lat.
“Ka rukom ba dei ban leh da ka EC….nyngkong kin hap ban mynjur ha ka EC bad hadien kin sa wanrah ha ka Iingdorbar…kumba long ka Meghalaya Legislative Assembly” ong u Bah Prestone haba bynrap “Kumta, ka rai bala shim da ka EC kam pat long pura satia…..lada ki kwah ban pynkylla, ka dei ban hap da mynjur da ka Iingdorbar bad wan sha u Lat ba un ai jingmynjur”.
Haba kyntait ia ka jingkynnoh ba dei ka jingbym lah ka Sorkar ba mih kane ka jingkulmar na ka GHADC, u Symbud Myntri Rangbah ula ong “Phim lah ban kynnoh ia ka Sorkar namar kane baroh ka shong ha ka bor jong ka ADC”.
“Ki don ia ka bor Legislative (thaw Ain), Judicial (tian bishar) bad Executive (pyniaid ia ka synshar khadar) kumba long hi ka Sorkar Jylla bad Sorkar Pdeng…..kumta, phim lah ban ong ba dei ka jingbym lah treikam ka Sorkar bad ba sa mih kane ka jingkulmar” ong u Bah Prestone.
“Ha ka jingshisha, ka District Council dalade lada ka sngewthuh, kala dei ban pynlong ia ka Dorbar ba kyrpang ban iakren ia kane ka kam. Namar kila iatip lypa ia kane, balei ba kim shym la iakren ia kane ka kam? Wanrah ha ka Dorbar Kyrpang bad sa mynjur ia ka bad sa pynpoi sha u Lat ban ai jingmynjur” ula bynrap.
Ula ong ba ka Sorkar kam don bynta satia ha kaban bthah ia ka GHADC ba kan pynkylla iala ki jong ki Rules.
“Kam dei ka kamram jong ka Sorkar ban ong phi hap ban pynkylla ia kane katai bad mynjur ia kane katai…Ki dei ki nongialam bad ki dei ma ki kiba hap ban sngewthuh hangno ba donkam ban pynkylla ia ki ain, ki rule ne ki jingpyrrkhing kaba ki iohi ba don ka jingduna” ula ong.
 Bah Prestone Tynsong, ula kyntu ia ki paidbah ka ri-lum Garo ba kin ialong jai jai noh namar ka Sorkar kala shim ia ka rai ban pynkynriah shuwa ia ka elekshon GHADC, kaba la buh ban long ha ka 10 tarik Iaiong.){kind=link}