Guwahati, Nailur 05 : U Director General of Police (DGP) ka Assam, u Bhaskarjyoti Mahanta hynnin ka sngi U Blei ula kyntu ia ki skul Madrassa kiba treikam ha ka jylla ba kin upload ia ki kyndon treikam ki jong ki lyngba ka online.
Ia kane u Mahanta ula kyntu ia ki ha ka jingialang bad ki kynhun seng Islamic bapher bapher kiba don ha ka jylla, ha kaba ula pan ruh ia ka jingkyrshan lem ka jong ki na ka bynta ban tehlakam ia ki kam lehnoh.
“Ki don da ki hajar tylli ki skul Madrassa jong ki riew shimet ha ka jylla.Baroh ki pyndep ia ki rukom hala ki jong ki kyndon kiba long katkum ka jingngeit ka jong ki, ngi la kyntu ia ki ba kin upload ia ki kyndon lyngba ka online bad aipor ruh ia ki katto katne ba kin pyndep ia kane,” ong u DGP.
Nalor kata ula ong ruh khlem ka jingiatreilang bad kine ki kynhun seng Islamic kiba don ha ka jylla ngin ym lah ban khanglad ia ki jingtreikam jong ki lehnoh al Qaeda bad kiwei pat ki kynhun seng lehnoh kiba treikam ha ka jylla.
Naduh kine ki khyndiat sngi ba la dep, kila mih ki khubor ba ki don ki kynhun seng lehnoh kila la wan rung sha ka jylla ha ka rukom jong ki nonghikai niam bad napoh napoh kila don bynta ha ki kam pyntriem bad ha ki kam ialap pyrshah ri.
Da kaba pynshong nongrim halor kane, ki bor pulit kila ioh ban kem haduh 38 ngut ki briew kiba dei na ka kynhun seng lehnoh Al-Qaeda Indian Continent (AQIS) bad na ka kynhun Ansarullah Bangla Team (ABT).
Ha ka miet sngi Balang ba la lah, uwei u briew uba dei na ka kynhun AQIS bad ABT ula shah kem noh na ka nongbah Guwahati.
Ha kawei pat ka bynta, ki bor sorkar ha Assam kila pynpra noh ia ki laitylli ki skul Madrassa ha ki district bapher bapher ka jylla, kata hadien ba kala mih ka jingkynnoh ba la pyndonkam ia kine ki skul na ka bynta ki kam lehnoh.
U DGP ka Assam ula pyntip ruh ba kam shym la don kano kano ka jingjurip bniah ha kano ka rukom la pyniaid ia kine ki Madrassa ha ka jylla.
Ha katei ka jingialang la ia don lang ruh ki nongshong shnong rit paid kum ki Jamiat Ulema-e-Hind, Ahl al-Hadij, Ahle Sunnat Jamaat bad ki Nadwa.Kine ki kynhun kila pynthikna halor ka jingkyrshan kaba pura pyrshah ia ki briew kiba donkti ha ki kam ialeh pyrshah ri.
