Nongstoiñ, Naiwieng 24: Ka Bor District ha ryngkat ka jingïatreilang jong ka District Social Welfare Officer, District Child Protection Officer bad One Stop Centre, Nongstoiñ, ki la pynlong ïa ka jingai jinghikai ban pynsngewthuh ia ki paidbah ba ki lad pathai khubor halor ki kyndon ain ba iadei bad ki kam thombor ia ki Kynthei, ki Khynnah bad ka POCSO Act, hynne ka sngi palei ha Trysem Hall DC office.
Ka jingthmu jong kane ka prokram ka long ban ai jingtip sha ki paidbah ïa ka jingdon jong ki aiñ bad ki kyndon lada don ki jingshah thombor.
Ha kane ka programme la wan ïa shim bynta da u bah Garod LSN Dykes IAS Deputy Commissioner ka West Khasi Hills District kum u kongsan, u ADC bah HK Thabah MCS, kong VC War DSWO, DCPO bah W.Shabong, kong BL Marshillong Centre Manager One Stop Centre Nongstoiñ, kong AD Wanniang District Legal Services Authority Nongstoiñ, ki Ophisar bad ki nongtrei na ki tnad sorkar, ki sordar, ki sengbhalang nalor kiwei pat.
Haba ai jingkren kum u kongsan u bah Garod LSN Dykes, u la ong ba kane ka phang jong ka programme ka long kaba donkam haduh katta katta, ha kaba ka Sorkar ka la shimkhia bha bad ka Iingdorbar Thaw Ain ka Jylla ka la thaw ruh ïa ka committee kaba la tip kum ka Women Empowerment Assembly Committee, ban peit halor ka jingshah thombor bad jingshah ban beiñ jong ki kynthei bad khynnah.
U la kyntu ïa baroh kiba la wan ban ïa shim bynta, ban pynphriang ïa ka khubor sha ki paidbah shaphang kine ki ain khamtam sha ki shnong nongkyndong.
U la ai jingmut ruh ba ki awareness programme kin kham myntoi shuh shuh lada ki tnad sorkar, kin long noh hapoh kawei ka shatri ban pynphriang ïa ka khubor sha ki nongshong shnong. U la pynkut ïa ka jingkren da kaba pynshlur ia ki lanot ba kin wan shakhmat khlem ka jingtieng ban ïoh ïa ki jingïarap na ki pulit, ki kashari ne na ki tnad Sorkar lada wan ka jingshah ban beiñ ne shah thombor.
Kiwei kiba la ai jingkren ki long kong VC War, bah HK Thabah, kong BL Marshillong iba la ai jingkren halor ka domestic violence, bah W Shabong ïa ka child rights and protection, kong AD Wannïang shaphang ka POCSO Acts, kong DP Nongbri ïa ka domestic violence acts bad kiwei kiwei.
