Guwahati, Naiwieng 19 :Da kaba kynthoh pyrshah ia ka Aam Aadmi Party (AAP), na ka liang u Myntri Rangbah (CM) ka Assam, u Himanta Biswa Sarma hynnin ka sngi Thohdieng ula ong ba u Arvind Kejriwal u dei ban pynleit jingmut ha Punjab ha ka jaka jong ka Gujarat.
“Nga shu kwah ban aijingmut ia u Kejriwal ba un leit sha Punjab bad ban pynleit jingmut ha ka jylla.Ki rukom leh kam politik ka jong ki kan wanrah ka jingduh kaba khraw.U dei ban pynleit jingmut shwa kumno ban pyniaid ia ka Punjab,” ong u CM Sarma haba iakren bad ki ald pathai khubor.
Haba kynthoh halor ka jingsam ei ia ki lad jingiarap da ka AAP, u CM ka Assam ula ong ba kila sam ei ia ki kuli bad ki bom ha Punjab ha ka kyrteng jong ki kam aijingiarap.
Shwa kane u Sarma ula kynthoh ia ka politik jong ka longiing jong ka Congress bad ong ba ka jingtei ia ka Ram mandir ha Ayodhya kan ym wan urlong satia lada ka Congress kan dang don ha ka bor.
“Lada ka Congress ka dang don ha ka bor kan ym lah ban wan urlong ka Ram Mandir hapoh Ayodhya?..Sngewbha pyrkhat bad ki Mughal kila mih na India, hynrei man ka por ki (Congress) kila ong Babri Majid-Ram Mandir,” ong u Sarma haba iashim bynta ha ka jingialang ialap ilekshon ha Anjar Town Hall ha Gujarat.
“Kumno yn lah ban ianujor ia u Mughal abd u Blei Ram, ka Congress ka ju ong ka jingiakynad halor ka Ram Mandir-Babri Majid, shano u Blei Ram bad shano kita ki Mughal,” ula ong shuh shuh.
Shuh shuh une u CM ka Assam ula ong ruh ba ka ri kala hap ban ap ia u nongialam uba kum u Narendra Modi ha kaba iadei bad katei ka phang bad kaban sah histori.
Haba kren halor ka Ram Mandir, u CM Sarma ula ong ba kadei kawei na ki temple kaba kynsan tam ia kaba yn plie ha u snem 2024, hynrei watla katta na ka liang ka Congress kala kam ba ka sorkar ba la lamkhmat da u Narendra Modi kan ym lah satia ban pynurlong ia kane.
Lah ban kdew ba ka Election Commission ha ka 3 tarik mynta u bnai kala pynbna ia ka tarik na ka bynta ka jingpynlong ia ka ilekshon assembly ha Gujarat.Ka jingiathep vote na ka bynta kane ka ilekshon kan long ha ka 1 tarik bad 5 tarik u Nohprah bad ka jingniew ia ki vote kan long ha 8 tarik u Nohprah mynta u snem.
