Shillong Iaiong 29: U Myntri Rangbah ka jylla u Conrad K. Sangma hynne ka sngi Saitjain, ula ong ba ki samla pule kidei ban pynkhlain iala ka bor pyrkhat pyrdain ha ba ki iaid shakhmat haka jingim ka jongki haba pynpaw ba ki jingpass bha ha ki jingpule lem bad ka kyrdan kaba phi don kan iai long ka jingplie kabu ia phi hi.
Haba ai jingkren ha ka Convocation kaba saw jong ka ICFAI University kaba la long ha Tura, u Myntri Rangbah ula ong, “Nga dei u briew uba la pulom bad phiel la bunsien ha ka jingim ka jong nga bad bun ki briew kim tip ne bna eiei ia ka”.
Ula ong, ba ka jingpulom kam shym la ktah ne pynduh mynsiem ia u hynrei kala nang pynkhlain pynban ia u.
“Ngam shym la lah ban jop ha kiba bun ki bynta, hynrei nga la iai ialeh beit. Nga ngeit skhem ha ka bor jong ka jingduwai bad ban phaikhmat beit sha u Blei na ka bynta kiei kiei baroh. Ainguh ia u Blei ha kiei kiei ki iaid beit iaid ryntih bad wat haba kim shym la long kiba bha ba man. Ngi dei ban don ka jingngeit kaba skhem ha u Blei” ong u Conrad.
“Ka khyllipmat kaba phi lah pdiang iaka jingpulom, kan dei kaei kei kaba lah ban wanrah iaka jingkylla ha ka jingim. Ka jingpulom ka long kaei kaei kaba jia na ka bynta ka jingbha.Ngeit ia nga, kam shong tang ha kumno ngi shim ia ka bad ngi iaid shakhmat. Lada phi lah ban shimkhia iaka jingpulom ka jong phi, phin long uba la pynkhreh ban iakhun ia kino kino ki jingeh ne jingtynjuh bad ban pdiang ruh kumjuh ia ka jingseisoh” ong u Myntri Rangbah.
Ula ai khublei ia ki 544 ngut ki samla pule kiba la ioh pdiang ia ki Degree ki jongki na u Chancellor ka ICFAI University u Lt Gen Dr Arvinder Singh Lamba bad ka Vice Chancellor ka Dr Alicia Gatphoh.
U Conrad ula pynpaw iaka jingskhem jingmut ba kitei ki samla pule kin noh synniang ha kaban kyntiew iaka roi ka par jong ka jylla bad ka ri hi baroh kawei.
“Ha ki 5 snem kiba la leit, ka ri India kala long kum ka shlem jong ki karkhana bad ngi long ruh kum ka ri kaba ka ioh ka kot kala kiew bha ha ka pyrthei baroh kawei.Bun tylli ki ri ki don hapdeng ka jingkyrduh pisa tyngka ne kiban sa mad iaka jingkyrduh pisa, hynrei la khmih lynti ba ka ri India kan dei napdeng ki katto katne ki ri kiban ym shah ktah eiei. Wat lada kan don ka jingkyrduh pisa ha kylleng ka pyrthei” ong u Myntri Rangbah.
