Shillong, Naiwieng 13: U Myntri Rangbah ka jylla Conrad K Sangma ula kyntu ia ka jingdonkam ba ki ophisar ki dei ban buh hakhmat eh ia ki nongrep.
“Dei ban iai kynmaw beit ia ki jingmut jong phi ha ka kam bad namar jong no phi don hangne, bad ban wanrah ia ka jingkylla ha ka jingim jong ki nongrep bad kane kadei ban long kum kata ka jingai mynsiem” ong u Conrad haba kren ha ka jingpynhap pyrda ia ka Induction Training Programme na ka bynta ki ophisar kiba dang shu rungkam ha ka MAS-III jong u snem 2025 ha IATC, Upper Shillong hynne ka sngi Palei.
Ula pynkynmaw ruh ba kane ka jingialang kadei eh na ka bynta kine ki ophisar thymmai bad ba ka rukom treikam jong ka sorkar kadei da kaba pyniadon bynta lang ia baroh kiba donbynta ha ka kam bad kan ym long eh thik tang ha kaba iadei bad ka jingpyntyllun tang iaki skhim.
Ha kane ka jingialang la iadonlang u Timothy D Shira u Myntri ka rep ka riang, u Dr Shakil P Ahammed u Chief Secretary ka jylla bad ki heh ophisar sorkar na ki tand bapher bapher.
U Conrad Sangma, ula ai khublei ia kine ki ophisar thymmai bad ula iaroh ruh ia ka IATC kaba la pynthikna ha kaban ai ia ka jinghikai pyntbit kaba salonsar bad ia ki prokram na ka bynta kine ki ophisar thymmai khnang ba kin lah ban pynkhreh bha ialade ha kaba iadei bad ka kamram kum ki ophsiar ha ka rep ka riang.
Ula ong shuh shuh ba ka long kaba kongsan bha ia ka sorkar, ki ophisar ha ki Directorate bad ki ophisar ha ki shnong ki thaw ba kin iatreilang kum ka kynhun ban pynbeit ryntih ia ka rukom treikam ban lah pynurlong ia ka thong.
U Timothy D Shira, ula ong ba 70 % jong ki jingdon ki nongshong shnong ha ka jylla kidei kiba shong basah ha ki thain nongkyndong bad kiba bun na ki kidei ki nongrep.
“Ka jinglong jingman ki nongrep ha ka jylla jong ngi kam long kaba bha bad kidei kiba duk, kumta ban kyntiew ia ka ioh ka kot ka jongki kan shong eh ha phi” ula ong haba bynrap, ba kum ki ophisar kin donkam ban iakren man la ka por bad ki nongrep bad ula kyntu ia kine ki ophisar kiba thymmai ba kin pyndon bynta bad ki nongrep da kaba don ruh ia ka jingiai shah, ka jingsngewsynei bad da ka jingsngewkhia.
