Thmu ka Sorkar ban thaw ia ki Village Volunteer ha man ki shnong
Shillong, Iaiong 21: U Myntri Rangbah ka Jylla Conrad K Sangma, hynne ka sngi Thohdieng, ula kyntu ia ki Ophisar ka Jylla ba kin trei ne ai ka jingshakri da ka jingthmu bad pynkynmaw beit ialade halor kane ka jingthmu haba bynrap “Wat ailad ba ka bor, ka pisa ne kano kano ka jingshah thong ba kin pyniaid ha ka jingtrei jong phi bad ia ka jingpynleit jingmut haba shakri ia ki paidbah”.
U Myntri Rangbah ula kren ia kane ha ka jingrakhe ka Jylla ia ka National Service Day ba 16 ha ryngkat ka Ri baroh kawei, kaba la pynlong ha Conference Hall jong ka Pinewood Hotel. Ia kane ka jingialang la plie da u Myntri Rangbah ha ka jingiadon lang u Chief Secretary DP Wahlang, Addl Chief Secretary Dr Shakil Ahammad bad kiwei kiwei.
Ha kane ka sngi, u Myntri Rangbah ula ai khublei ia ki Ophisar kiba la aiti ha ka kam bad shakri ia ka Jylla bad ka Ri baroh kawei.
Encouraged our officers to continue working as a team with dedicated passion to ensure we not only bring smiles but positive difference in the lives of our people. Thank each of them for their service to our State and our nation. pic.twitter.com/ILbz7mssQz
— Conrad K Sangma (@SangmaConrad) April 21, 2023
“Wat ailad ba ka bor, ka pisa ne kano kano ka jingshah thong ba kin pyniaid ha ka jingtrei jong phi bad ia ka jingpynleit jingmut haba shakri ia ki paidbah..ki kam ki jam hi kin nym iaid bakla bad ngin sa lah ban kynjoh iaka thong” ong u Myntri Rangbah.
Haba kren halor ka jingdonkam ban iatrei kum kawei ka kynhun, u Myntri Rangbah ula ong “Haba ngi long kum kawei ka kynhun, ngi hap ban burom bad shaniah iwei ia iwei bad kyrshan iwei ia iwei khnang ba ngin ym pulom ha ka jingtreikam bad ka jingbahkhlieh ia ka kam”.
U Myntri Rangbah ula pyntip ruh ba kan sa don shibun ki jingpynjanai (reforms) bad jingpynkylla ha ka jingshakri ki Ophisar ha kine ki sngi ban wan bad ong “Kawei na ki jingpynjanai ba kongsan kaba la tyrwa ka long ban don ia ki Village Volunteer bad kine ki Volunteer kin dei ki Nongmihkhmat jong ka Sorkar ha ki Shnong ki Thaw”.
“Ngin don kumba 6500 ngut ki Volunteer ha manla ki shnong ki ban iasoh bad ka Sorkar lyngba ka central database, ban iarap ia ka Sorkar ban ioh ia ki jingtip ba kloi halor kiei kiei kiba jia ha ki shnong ki thaw” ula bynrap.
U Conrad ula batai ba kine ki Village Volunteer kin pyntip sha ka Sorkar ia kino kino ki jingjia ba donkam tuklar kyrkieh da ka sorkar (emergency) kum ka jingshlei um, ka jingtwa khyndew, ka jingthut ka bording bad ka um haba bthei ki transformer ne ki pile um bad ki village volunteer kin long ruh ki Banking Correspondent jongka Old Age Pension, ban iarap ia ki briew ba duna dkhot met bad kiwei ki skhim jong ka Sorkar ba kin poi sha ki briew hala ki thliew iing”.
U Conrad ula pyntip ba kine ki volunteer ha ki shnong ki thaw kin iatreilang ruh ha ki prokram bapher bapher jong ki Self Help Group khnang ba ka jingshakri kan kham suk bad kham step khnang a ki shnong kiba donkam ia ki jingshakri kum ha ka jingpan syrnod (certificate), Scheme bad kam pynroi kin nym mad ia ki jingeh kiba don ha ka rukom treikam jong ka sorkar.
U Conrad ula kren ruh halor ka jingdonkam ban aibor bad pynkhlain ia ka jingdon ki Gram Sevak bad ban khmih ruh ha kaban pynjanai ia ka rukom treikam ba mynta jong ki Gram Sevak.
Shuwa kane, u Chief Secretary ka Jylla Bah DP Wahlang ula ong ba ha kine ki snem bala leit noh, ka kam Civil Services kala shah kynthoh bha bad kala dei ka por ban phaidien bad iabishar balei ba kane ka kyrdan kala thohbria bad balei ba ka jingmut jong ka Civil Service kala shah buh dak jingkylli na ka por sha ka por.
U Chief Secretary ula kren ruh halor ka jingiadei hapdeng ki Ophisar bad ki paidbah bad ruh hapdeng ki Ophisar bad ki Myntri Sorkar.
“Ngi donbok palat ban ioh trei ha ka Jylla kum ka Meghalaya namar ki Myntri Sorkar hangne ki kham pher na kiwei ki Jylla ka Ri ha kaba bunsien ngi iohi ia ka jingiashrut hapdeng ki Myntri Sorkar bad ki Ophisar” ula bynrap.
Ka matpdeng jong kane ka jingrakhe National Service Day mynta u snem ka dei ka ‘Viksit Bharat’ kaba thmu ban ‘pynkupbor ia ki nongshongshnong bad ban poi sha u mawmer ba khatduh”.
