Shillong, Nohprah 12: U Myntri Rangbah ka Jylla Manipur u N. Biren Singh hynne ka sngi Ba-ar, ula kyntu ia u Myntri Rangbah ba thymmai ka Jylla Mizoram u Lalduhoma ban ym dei ban kren kren eiei halor ka jinglong jingman hapoh ka Jylla Manipur.
Haba kren sha ki lad pathai khubor u N. Biren Singh ula kyntu ia u Lalduhoma ban num tuklar halor ka jinglong jingman ka Manipur hynrei u dei ban ai jingkyrshan ban wanrah jingsuk biang hapoh kane ka Jylla.
U Biren Singh ula kyntu iaka Jylla ba marjan ban kyrshan lem haki sienjam baka Sorkar Jylla ka shim naka bynta ban wanrah biang iaka shong suk shong shngain hapoh ka Jylla Manipur bad kiar ban kynthoh khlem nongrim.
“Kaei kaba la jia ha Manipur kadei ka kam ïing. Baroh kiba don haka Sorkar ki kyrshan iaka Sorkar ban wanrah biang iaka shong suk shong shgain hynrei naka liang u Myntri Rangbah ka Jylla Mizoram, Nga la iohi ba ula kynnoh ba ki Pulit ki pynwit ia ki briew jong u ha Moreh. Ka long palat iaka riti synshar namar ka Moreh ka dang hap ha Manipur. Um don jingtip jia aiu Moreh. Bun ki jaidbynriew ki don ha Moreh. Nga kyntu ia u ban kyrshan lem iaka Sorkar kaba dang pyrshang ban wanrah biang ka shong suk shong shngain hapoh ka Jylla Manipur” la ong u Biren.
Ia kane ula kren haka jingkynmaw iaka sngi Nupi Lal Numit, 2023 kaba la long ban kynmaw burom iaki kkynthei kiba la iakhun pyrshah iaka Sorkar phareng.
