Shillong, Nailur 21 : U MLA ka BJP na South Shillong Bah Sanbor Shullai ula kyntu ia u Myntri Rangbah ka Assam bad Chief Convener ka NEDA Himanta Biswa Sarma, ba ka Sorkar Assam ka dei ban shim da ka suo moto case halor ka jingbyrngem jong ka All Assam United Motor Transport Association (AAUMTA) ban khang pynpoi ia baroh ki mar ki mata sha Meghalaya kynthup ki marbam.
U Ban Sanbor ula ong ba ka jingbyrngem jong ka AAUMTA ka dei kaba hap pyrshah jur bha bad ka dei ruh kaba hap ban pynrem tyngeh. “Kum kane ka sienjam ka iaid pyrshah ia ka jingiadei ba da ki spah snem hapdeng ki briew jong ngi, ka pynkhein ia ka mynsiem ialong shipara hapdeng ki Jylla ka thain Shatei Lam Mihngi” ula ong.
Kane ka jingbyrngem ka AAMUTA kala mih hadien b aka All Khasi Meghalaya Tourist Taxi Association, kala dawa ia ka Sorkar Jylla ban khang noh ia baroh ki kali Tourist ba nabar ka Jylla khamtam na Assam, ba kin wan kamai bad kit ia ki nongshangkai pyrthei sha ki jaka jngohkai kiba don hapoh ka Jylla.
Haba pynpaw ba kum kine ki kam ki dei ia kaban hap pynbeit da ka jingiasngewthuh jingmut hapdeng ki ar seng, u Bah Sanbor ula ong “Dei ban shim nuksa na ki sienjam bala shim da kiwei ki Jylla kum ka Sikkim bad Darjeeling ha West Bengal, ha kaba ki kynhun na baroh ar Jylla kila mynjur ia ki katto katne ki kyndon treikam kiba iadei”.
U Bah Sanbor ula ong ba ki jingsngewkhia bala pynsngew da ka All Khasi Meghalaya Tourist Taxi Association ka dei kaba shonghok, hynrei, ka dei ia ka ban hap pynbeit lang bad ka Assam Tourist Taxi Association.
“Baroh ar liang ki dei ban poi sha ka jingiasngewthuh jingmut ka ban pynmyntoi ia ki riew paidbah bad ki nongshangkai pyrthei ruh kumjuh” ula ong.
“Ngi kum ki kynhun ba iadon bynta ha Meghakaya, ngi donkam ban wanrah ia ki sienjam da kaba pynbiang ia ki jingdon kam kiba kham bha ha ka liang ka dor kaba biang, ki jingdonkam kiba kham bha bad ka jinglong paralok khnang ba ki nongshangkai pyrthei kiba wan na shabar ka jylla kin kham sngew shngain, kin sngewtynnat ia ka jingsah jong ki ha Meghalaya bad kin kham jied ia ki kali Tourist na Jylla. Baroh ki seng jong ki tourist taxi ka jylla Meghalaya bad kiwei kiwei ki kynhun ba don bynta ki dei ban iashong ha ka miej ban iakren ia kane ka kam banlah kyntiew ia ka kam jngohkai pyrthei” ula ong.
Ka sorkar Meghalaya hapoh ka jingialam u Conrad Sangma, ka la shim ia bun bah ki lad ki lynti ban kyntiew ia ka kam jngohkai pyrthei hynrei ngi donkam ban shim hok bad ban tei ia kane ka kabu.
Ula ong, ka kam jngohkai ka Meghalaya ka lah ban poi sha ka kyrdan kaba ha khlieh duh hapoh kine ki 10 snem ban wan namar ka sienjam ba la shim da ka sorkar MDA ka lah ban pynkiew ia ka jinglah jong ngi ban pdiang ia ki nongshangkai pyrthei haduh 50 lak ha ka shisnem.
 ban khang pynpoi ia baroh ki mar ki mata sha Meghalaya kynthup ki marbam.){kind=link}