Shillong, Lber 25 : U President ka National People’s Party- Meghalaya bad Symbud Myntri Rangbah Bah Prestone Tynsong ha ka sngi Nyngkong, ula kyntu ia ki paidbah ka Jylla Meghalaya ban kyntait bad ban nym pdiang satia ia ki jingkynnoh jong kiwei ki seng sain pyrthei ba ong ba ka NPP bad ka BJP ki dei kajuh.
“Ka jingkynnoh ba ka NPP ka dei ka BJP bad ka BJP ka dei ka NPP ka dei ka bym lah pdiang. Kum kine ki jingkynnoh ki ju mih tang shisien ha ka san snem kata ha ka por elekshon MP, MLA bad MDC. Kumta, nga kyrpad ia ki nongthep vote ba kin ym ngeit ia kum kine ki jingkynnoh, kiba mih tang ha ka por elekshon” ong u Bah Prestone haba iakren bad ki nongthoh khubor.
U Bah Prestone ula kynthoh ia kane halor ka jingmih ki jingkynnoh hadien ka rai jong ka BJP ban kyrshan ia ki kyrtong ka NPP na Shillong bad Tura Parliamentary seat ha kane ka elekshon Lok Sabha ka ban long la 19 tarik Iaiong.
U Bah Prestone ula pynkynmw ba ha u 2018 ruh, kum kine ki jingkynnoh kila mih ba ong ba ki briew kim dei ban vote ia ka NPP naba ka NPP ka dei ka BJP bad lada ki jop elekshon, kin sa khang khyrdep ia ki Iingmane bad knieh noh ia ka jing long laitluid ki paidbah ban mane bad bud ia kano kano ka niam ba ki kwah.
“Kane ka dei ka jingkynnoh ha katei ka por. U Blei uba khraw namar ha ka por ba ngi jop bad thaw ia ka Sorkar naduh u 2018 haduh 2023, nga kwah ban kylli ia kito kiba kynnoh ba hato kala ju don ka jingpyrrkhing ban mane blei ia ki briew ha kano kano ka por da ka Sorkar hapoh ka jingialam jong ka NPP. Kum ka NPP, ngi la kut jingmut ban iada ia ki rit paid bad kwah ruh ban iada ia ka snap kyrpang jong ki trai riewlum jong ka thain Shatei Lam Mihngi bad ka Ri India baroh kawei” ula ong.
U Bah Prestone ula ong ruh ba ka BJP kala ai ia ka jingkyrshan sha ka NPP khlem da buh ia kano kano ka kyndon.
“Nga la iohi ia ki jingkynnoh kiba la mih biang ba ong ba mynta la thikna ba ka NPP ka dei ka BJP bad ka BJP ka dei ka NPP tang namar ba ki Nongialam ka BJP kila rai ban kyrshan ia ka NPP ha Shillong bad Tura Parliamentary seat. Kum u President ka NPP ha Jylla, nga kwah ban ong ia kane, ngi pdiang sngewbha ia ka rai jong ka BJP ban kyrshan ia ki kyrtong jong ka NPP khlem da buh ia kino kino ki kyndon” ula ong.
“Kum ki Nongialam, ngi la kyndit bad ngi khlem khmih lynti ruh namar ki (BJP) ruh kila pynkhreh ban khot thep kyrteng ia kiba kwah iakhun elekshon na Tura bad Shillong . Ngi dang pyrkhat ba ka BJP kan iakhun beit. Hynrei ngi ieh ha ka jingstad jong ki. Lehse ki Nongialam ka BJP ki pyrkhat ba kan bha ban kyrshan ia ka NPP naba ka NPP ka iatreilang ha ka NDA” ula bynrap.
U Bah Prestone ula ong ba ka NPP kala kyrshan ruh ia kiwei pat ki seng sain pyrthei n aka thain Shatei Lam Mihngi, kiba dei kiba iatreilang ha ka kynhun NDA.
“Ngi la kyrshan ia kiwei ki party ha Manipur bad ha Nagaland. Kane kam mut tang namar ba ngi kyrshan ia ka NDA, phin ong noh ba ngi klet ia ka riti treikam jong ka Party lajong” ula ong.
