Kyntait ia ki jingkular ban pynioh kam Sorkar iaki paidbah
Shillong, Jylliew 08: U President ka Voice of the People Party (VPP) Bah Ardent Miller Basaiawmoit, ha ka sngi Saitjain ula ong ba lada ka Meghalaya Democratic Alliance (MDA) ba ialam ka NPP, kam lah ban pyniaid ia ka Sorkar, ka dei ban ailad ia ka VPP ba kan shimti bad synshar ia ka Jylla.
“Ki don ki Myntri Sorkar, kiba ong ba mynta ka dei ka kamram jong u MP ka VPP ban kren ia ki ishu jong ki paidbah hapoh ka Parliament hynrei ha nga hi nga sngew ba kila dei ban ong ba ka VPP ka dei ban shimti hi noh ia ka Sorkar Jylla, kan bha shibun namar lada phi sngew ba phim lah pyniad ia ka Sorkar, ailad ia ngi banshimti bad synsharia kaJylla” ong u Bah Ardent.
U Bah Ardent ula kren ia kane ha ka rally bala pynlong ha Smit ban aikhublei ia ki paidbah ka Ri-lum Khasi Jaintia namar ka jingkyrshan ia ka VPP ha ka elekshon Lok Sabha ba dang shu dep.
U kyrtong ka VPP Dr Ricky AJ Syngkon ula pynliem ia u MP ba lai samoi jong ka Congress Bah Vincent H Pala da palat 3.7 lak vote, ka jingtam kaba bun tam ha ka histori jong ka Jylla.
U Bah Ardent ula kynnoh ruh ia ka Sorkar MDA ba ka sheptieng ban pynlong ia ka elekshon MDC da kaba pynjlan ia ka samoi treikam ka Khasi Hills Autonomous District Council (KHADC) bad Jaintia Hills Autonomous District Council (JHADC) by six months.
“Hadien ka elekshon MLA, ka elekshon MDCkala dei ban long hynrei nab aka Sorkar MDA ka sheptieng ia ka jingkyrshan ki paidbah ia ka VPP, kila pynjlan ia ka samoi treikam jong ki ar ADC. Kila ong ba to ngin iakhun ia ka elekshon MP namar ki sngew thikna ba ka VPP kan rem bad ka lyer kala jah noh hynrei kala kylla pynban da pyrdep, ka VPP kala jop kput” ula ong.
U Presdent ka VPP ula ong ruh ba don ka jingartatien ba ka Sorkar MDA kan pynlong ia ka elekshon MDC namar ki dang bunkam ban pynjai jai ia ka lyer jong ka VPP khnang ba kan nym ktah ia ki ha ka elekshon MLA 2028 hapoh ka Jylla.
Ha kajuh ka por, u bah Ardent ula kyntait ba ka VPP kala kular ban pynioh kam Sorkar ia ki paidbah.
“Ngim pat ju kular ban pyniohkam Sorkar. Ngi khlem kular ia ki briew ban ai kam Sorkar hynrei ngi shu kyrpad ia ki ba kin vote ia u MP jong ngi khnang ba un lah ban leit sha Parliament ban iakren bad ka Sorkar Pdeng halor ki ishu bapher bapher ba ktah ia u paidbah” ula ong.
 Bah Ardent Miller Basaiawmoit, ha ka sngi Saitjain ula ong ba lada ka Meghalaya Democratic Alliance (MDA) ba ialam ka NPP, kam lah ban pyniaid ia ka Sorkar, ka dei ban ailad ia ka VPP ba kan shimti bad synshar ia ka Jylla.){kind=link}