Shillong, Jymmang 27 : Ka North Eastern Hill University Teachers’ Association (NEHUTA), North-Eastern Hill University Non-Teaching Staff Association (NEHUNSA) bad North-Eastern Hill University Students’ Union (NEHUSU), kila kyntu ia ki dkhot jong ka Executive Council (EC) jong ka University ba kin nym leit iashimbynta ha ka jingialang ka ban sa long ha Delhi ha ka 30 tarik Jymmang.
“Kum ki dkhot ba don burom ka Executive Council-kaba dei ka Executive Body ba hakhlieh duh ka University, kaba dei ban peit ia ki jingpyniaid ia ki kam ki jam jong ka University kat kum ka Act, Statutes bad Ordinance bad CCS Rules ka Sorkar India, ki lai tylli ki seng ka University ki kwah ban kyntu ia phi ban nym leit iashimbynta ha ka jingialang jong ka EC ka ban long ha Delhi ha ka 30/05/2025” ong ka kyrwoh bala iasoi lang da ki laitylli ki seng ha ka sngi Balang.
“Ki lai tylli ki seng ki kren shai ba kino kino ki dkhot kiba jied ban iaid pyrshah ia kane ka jingkyntu bad ym khein snep ia ka nongrim bala shim da ki laiseng, yn khein ia ki kum ki nongialeh pyrshah ia ka bha ka miat ki samla pule, ki nonghikai bad ki nongtrei lem bad ia ki seng jong ki bad kumjuh ruh ia ka skulbah baroh kawei. Ngi khmih lynti ia ka jingiatreilang jong phi” kala bynrap.
Ka kyrwoh ka ong ba ki lai seng ki sngewkhia jur ia ka jinglong jingman jong ka University ha kane ka por ba mynta hadien ba u Vice Chancellor ba pura ula shim shuti Earned Leave kat kum ka jingai jingmut jong u Director, Higher Education, ka Sorkar India naduh ka 15 tarik Naiwieng 2024, ia kaba ula pynjlan haduh ka 2 tarik Lber 2025 bad haduh mynta um pat wan shimti ia ka kam wat hadien bala kut ka shuti hapoh ka Headquarter jong ka NEHU, Shillong.
“Kane ka long kum ka jingiai pep na ka kam hapoh ka Headquarter ha NEHU, Shillong la palat 193 sngi (lane palat 6 bnai) shisien jah. Ki lai tylli ki seg ki la shimkhia ruh ia ka jingbym pat pynpaw paidbah ka Ministry of Education, ka sorkar India ba iadei bad kaiphod jong ka Inquiry Committee kaba tohkit halor ki kam jong u Prof Shukla”.
Kil akdew ruh ia ka jingkren ba dang shen jong u Prof Shukla ba khein poh ia ka jingiakren bad ki jingmynjur bala shim hapdeng ki kynhun kaNEHU bad ki dkhot jong ka kynhun ka Ministry of Education kiba la wan iuhkjat ha NEHU ha ka 22 tarik Jymmang, kaba lah ban lam sha ka jingpynbeit noh ia ki kynrum kynram ha NEHU.
