Dimapur, Risaw 06 :Namar ki khubor kiba iadei bad ka jingshah rahbor jong ki khynnah ha baroh ki bynta jong ka jylla Nagaland, na ka liang ka tnat pule puthi ka sorkar jylla kala kyntu ia baroh ki skul, kata ki skul sorkar bad ki skul shimet kumjuh kiba don ha ka jylla ba kin shim ia baroh ki lad jingiada.
Lyngba ka jingpyntip, na ka liang u principal director jong ka tnat pule puthi ka sorkar jylla, u Thavaseelan K ula pynmih ia ka hukum sha baroh ki skul ba kin shim ia baroh ki lad jingiada khnang ban lah ban khanglad ia kiba kum kine ki jingjia shah rahbor.
Katei ka tnat kala hukum ruh ia ki skul ba kin pynkhamti ha u/kawei ka nonghikai na ka bynta ban khmih ia ka shikynhun lane shi klass ki khynnah ban tehlakam ha kaba iadei bad kito ki briew ki bym lah ban ithuh hapdeng ki khynnah skul bad ruh ban bishar bniah ia uwei pa kawei ka briew kiba iakynduh ia ki khynnah hapoh skul.
Nalor kata la ong ruh ba ia ka jingshim kyrteng ha ka period kaba nyngkong dei ban pynthikna da baroh ki nonghikai kiba shim sobjek.
Lada jia ryngkat ba shem ba don ki khynnah ki bym wan skul, na ka liang ki bor pyniaid skul lane ki nonghikai ki dei ban pyntip sha ki kmie ki kpa ban pynthikna la ki khun jong ki, ki pep skul da shisha ne ioh ba ki jah rngai.Nalor kata la kyntu ruh ia ki bor pyniaid skul ba kin bteng ha kaba iadei bad ka jingpynshai hapdeng ki khynnah skul, ki nonghikai bad ki kmie ki kpa ryngkat ka jingiatreilang bad ki bor pulit, ong katei ka jingpyntip.
Katei ka tnat kala hukum ruh ia ki skul ba kin ai ka jingpynshai hapdeng ki khynnah skul halor kumno ban khanglad ia ki kam rahbor lyngba ki phlim lyngkot, ki jingialehkai, ki jingdro lane lyngba kiwei pat ki jait jingiakob lane lyngba ki jingai jingpynshai.Lah ruh ban pynlong ia ki mock drill ne jingialehkai ban hikai lada jia ba ki jingshah rahbor ki lah ban jia ha kiba bun rukom, kata kum ka jingshah rahbor napoh ki steshon rel lane bus lane napoh skul, ong katei ka tnat.
Nalor kata katei ka tnat kala ong ruh ba dei ban hikai ia ki khynnah kumno ba kin her bran bran ban pan jingiarap na ki para marjan kata kum ki nongniah ia ki bus skul, ki principal lane ki nonghikai hapoh skul, ki kmie ki kpa lane najan ki iing mane kiba don harud surok, ki bor pahara hapoh ki rel bad kiwei pat.
Shuh shuh dei ruh ban aijinghikai ia ki khynnah ba kin kynmaw la kumno kumno ia ki artylli ki phone nombor ba donkam kyrkieh bad artylli ki jaka shong jaka sah, kata jong ki kmie ki kpa ne ki nonghikai khnang ban lah ban pyndonkam haba jia ka jingdonkam ba kyrkieh.
