Shillong Iaiong 29: Ka Tnad DoNER, NEDFi, SBI bad ka Confideration of Indian Industry kila pynlong ia ka ka North East Banking Conclave ha ka 28 tarik u Iaiong ha Nongbah Delhi ban iathir jingmut ban pynroi ia ki lyngkha seng kam la jong ha ka Thain Shatei Lam Mihngi.
U Myntri ka tnad DoNER u G.Kishan Reddy ula long u kongsan ha kane ka jingialang ha ka jingiadon ryngkat u Myntri Khynnah ka DoNER u BL Verma, u Myntri Khynnah ka Pla Tyngka jongka sorkar pdeng u Dr Bhagwat Karad lem bad ki heh ophisar ka DoNER, Ophisar na ki jylla jongka Thain Shatei Lam Mihngi, ki Ophisar ka NEDFi, SBI bad kiwei de ki Bank.
U Reddy ula pynpaw iaka jingdonkam jong ki lyngkha sengkam sengjam ban iarap ha ka roi ka par ka Thain Shatei Lam Mihngi bad ula kyntu ia ki Bank ban iatreilang bad ka tnad DoNER ban weng iaki jingeh khnang ba kin lah ban ai jingiarap kloi ia kine ki lyngkha trei da ka ram ban pynheh shuh shuh ia ki.
Ula ong, mynta ka Thain Shatei Lam Mihngi kala nang jam ha ka roi ka par bad kala don palat 17 tylli ki kad liengsuiñ ha kane ka thaiñ bad ka sorkar ka don ka jingthmu ban pyniasoh ia baroh ki Sorbah jong baroh ki jylla ha ka Thain da ka Rel hapoh u snem 2024.
Ha kane ka jingialang la iawer ia ki bank ban long kiba kloi ban ai ka kti kamon ka kti kadiang ban iarap ia kiba kwah seng kam lajong lane ki karkhana ai kam ai jam ban iarap ia ki samla kane ka thaiñ.
