Shillong, Risaw 02 : Ka myntri ka koit ka khiah ka Dr M Ampareen Lyngdoh kala iashimbynta ha ka National Voluntary Blood Donation Day, kaba la pynlong ha Nazareth Hospital, Laitumkhrah, Shillong hynne ka Sngi Nyngkong.
Ka Myntri kala kyntu ia ki nongshong shnong ka jylla ba kin mih shakhmat ha kane ka mishon kaba kongsan ban pynthikna ba ka Ayushman Bhav bad ka Sewa Pakhwada kan ngam ha man la ki iing bad ha kyndong kynshrot jongka jylla.
Ka jingai ia ka snam na ka bynta jingsumar kaba kyrkieh ka long kaba kongsan bha kum ka jingnoh synnianng sngewbha ban pynthikna ba ki nongshong shnong kin ioh jingmyntoi shisha na ka jingioh jingsumar kaba Salonsar ia baroh. Ka snam ba kordor kaba la noh da baroh ki blood donating organization kiba la ioh ia ka jingithuh haduh ki blood storage centers kiba la ioh jingithuh ka long kaba kongsan bha ia ka jylla Meghalaya.
Kala ong ba ka jingnoh synniang ia ka snam ha kane ka jylla ka long kaba duna bha kaba poi tang 18 % ha ka jylla baroh kawei haba ianujor bad ka 100% jongka National Average.
Ka imlang sahlang ka hap ban mih shakhmat bad ban iar ka jingmut jingpyrkhat ban sdang ia ka jingnoh synniang tista ia ka snam.
Ki khana bad ki jingsngewthuh bakla halor ka jingai snam kadei ka bynta kaba la ktah bha ia ka jingnoh synniang ha ka jylla Meghalaya.
Haba kynmaw burom ia u M.K Gandhi u Kpa jong ka ri bad u nongiakhun ban pynioh ia ka jinglaitluid ka ri, ka Kong Ampareen kala ai jingiaroh ia ka synniang kaba khraw jong une u nongialam ba radbah ka ri bad ka long kaba iahap bha ban pynlong ia kane ka prokram ha kane ka sngi ha kylleng ka ri.
Ha kane ka program la iaroh bad ai jingithuh ia ka jingnoh synniang jong baroh bad ia palat 45 tylli ki blood donation organizations ha kylleng jong ka East Khasi Hills bad Ri Bhoi Districts, kila shah pynkup burom bad ka jingialang kala shim ruh ia ka smai ban kular bad shim ia ka jingkitkhlieh ban pynpawnam ia ka jingnoh synniang ia ka snam.
