Shillong, Naiwieng 25: Ka Meghalaya Tourism Development Forum (MTDF) hynne ka sngi ka kyntu iaki sengbhalang ba kin kiar na ki jingiakhih kiba lah ban ktah iaka shong suk shong shngain hapoh ka jylla namar kane kan ktah iaka kam jngohkai hapoh ka jylla baroh kawei.
Ka kyrwoh na u bah Aiban S Mawkhroh u Chairman ka MTDF ka kdew ba ka Forum ka pynrem jur iaka jingshah siat iap ki riew paidbah napoh ka shnong Mukroh ha ki pulit Assam bad ka Forum ka ieng bad bad ka don ryngkat lang bad ki lanot.
Ka Forum ka phah ka jingsngewlem sha ki longïng ba khlad na ka jingshah ther kuli ha ki Pulit Assam bad phah ruh ka khubor donbok sha kito kiba dang don hapdeng ka jingshah sumar hapoh ki Hospital.
Naka liang ka Forum ka dawa naka sorkar Meghalaya bad Assam ban pynbeit noh iaki kynrum kynram khamtam haba iadei bad u pud u sam khnang ban pynthikna ba kum kine ki jingjia kim dei shuh ban jia sa shisien pat.
“Ka Forum ka ieng lang bad ki jingdawa jong ki sengbhalang hynrei ha ka juh ka por ka kyntu iaki sengbhalang ban kiar na ki jingiakhih kiba lah ban pynthut iaka iaid ka ieng ki paidbah namar kane kan ktah iaka kamai kajih ki paidbah bad kumjuh ruh iaka kam jngohkai pyrthei hapoh ka jylla” la ong ka kyrwoh.
Ka kyrwoh ka kdew ba ka Forum ka kyntiew iaka kam jngohkai pyrthei ha ki thain nongkyndong bad ki jingjia ha nongbah Shillong ha kine ki sngi ki ktah jur bha iaki kam jngohkai kum iaki Hotel, ki homestay, ki nongpyniaid iaki Camping Sites bad ki nongkamai kali khamtam kiba dei hi ki trai ri trai muluk.
Ka Forum ka pynkynmaw ba ka jylla kala mad shibun ki jingeh namar ka jingwan lynshop ka khlam COVID bad kane ka jingsdang biang ki jingiakhih da ki sengbhalang kan nang ktah shuh shuh iaka kam jngohkai pyrthei hapoh Meghalaya.
Nalor kane ka MTDF ka kyntu iaka tnat Tourism ban pynbiang da u Hotline Number naka bynta ban iarap iaki nong wan shang kai pyrthei kum shi bynta ban kyntiew iaka kam jngohkai hapoh ka jylla daka ba pynthikna ban don ka shong suk shong shngain hapoh ka jylla.
